Министрите за надворешни работи на Македонија и Грција следната средба ќе ја имаат во Солун на 3 и 4 мај, а една седмица потоа и во Сунио.
По вчерашната заедничка средба со Никола Димитров и Никос Коѕијас во Виена, медијаторот Метју Нимиц не откри повеќе детали, и само кусо истакна дека имале интензивна дискусија во која двете страни покажале меѓусебна почит.
– Двете страни се посветени на постигнување решение и процесот ќе продолжи во следните недели, изјави Нимиц по средбата што се одржа во канцеларијата на ОН во Виена.
Министрите Димитров и Коѕијас по средбата не дадоа изјави за медиумите.
Грчки медиуми: Кои се проблематичните точки
Грчките медиуми уште пред средбата во Виена ги лоцираа проблематичните точки -грчкото барање за ерга омнес, односно име за севкупна употреба и уставна ревизија.
– Господата Коѕијас, Димитров и Нимиц ќе ги разгледаат сите прашања што се веќе договорени на досегашните одржани преговори и ќе ги одвојат темите „трнови“ што уште ги држат далеку Атина и Скопје. Како основен „трн“ се појавува опсегот на употреба на новото име, бидејќи Атина инсистира на име за севкупна употреба и за сите, додека пак ПЈРМ преферира „двојно име“, односно име за меѓународна употреба и задржување на уставното име за употреба во внатрешноста, објави грчкото радио „Атина 984“, пренесе МИА.
– Сите чекори што требаше да ги направиме, ги направивме, рекол владин претставник за грчкиот информативен портал „Iefimerida“ и додал дека другата страна, односно Македонија, треба да ги направи останатите чекори.
Според порталот, грчката влада тврди дека не постојат временски ограничувања, а преговорите продолжуваат.
Онлајн изданието на весникот „Прото тема“ коментира дека „не е мал бројот на оние од Западот“ што ја притискаат Грција и повикувајќи се на дипломатски извори пишува дека е постигнат договор за техничките прашања.
– Но, во суштина, се чини дека Скопје се појавува побескомпромисно во преговорите. За многумина, оваа разврска покажува дека во позадина, пријателите и партнерите на Грција во НАТО и ЕУ веројатно немаат намера да извршат притисоци кон Скопје за отстапки, туку ја притискаат грчката страна кон отстапка од „црвената линија“ за сложено име за севкупна употреба (ерга омнес) и од барањето на Грција да се отстранат сите иредентистички наводи од Уставот на Скопје, пишува „Прото тема“.
Средба Косијас- Столтенберг
Шефот на грчката дипломатија денеска ќе има средба со генералниот секретар на НАТО, Јенс Столтенберг во седиштето на Алијансата во Брисел.
Како што јавуваат грчките медиуми, Столтенберг и Коѕијас ќе разговараат за прашањето за името меѓу Македонија и Грција, за грчко-турските односи и за случајот со двајцата грчки војници што се наоѓаат во турски затвор.
Коѕијас, во интервју за грчкото радио 247, неодамна рече дека на следниот НАТО самит во јули, Македонија не може да стане членка на Алијансата, бидејќи е краток временскиот рок.
Тој додаде дека дури и да се постигне договор, нема доволно време за да се заврши целата процедура.