Пред две години во финалето против ПСЖ (24:23), Тимур Дибиров постигна шест гола, оваа година во финалето против Веспрем (27:24) даде три за нова титула на Вардар во ракометната Лига на шампиони во третиот настап на Фајналфор турнирите во Келн. Првата е секогаш незаборавна, но втората е специфична по многу нешта.
Освоена е во тешки услови, без редовна исплата на плати, со еден куп проблеми со повреди, со неколку нови лица во ростерот и со најава на Сергеј Самсоненко дека повеќе не може сам да финансира. Го нема и тренерот и екс селектор, Раул Гонзалез алијас „ел команданте“ чија позиција храбро ја презеде неговиот сонародник Роберто Гарсија Парондо.
„Можеби бевме поуморни од нив бидејќи подоцна игравме во полуфиналето со Барселона, можеби бевме во подредена улога поради „помалата“ клупа, но нозете сами нè носеа во финалето и едноставно како да летавме по теренот. Со денови слушаме дека Барселона е институција како и Кил, но никој нема срце како нас“, истакна рускиот репрезентативец по втората победа во второто „црвено-црно“ финале во „Ланксес арена“ кој по победата над Веспрем објави фотографија на својот Инстаграм профил со пехарот во рака под која напиша „извини што те оставивме една година“.
Ако нивото на игра низ сезоната имаше осцилации, што на некој начин е логично по турбуленции, тогаш карактерот, срцето и желбата за машка, витешка, борба останаа недопрени. Па, дури и надградени за што ракометарите треба да бидат наградени со избегнување на судбината што лани ја доживеаја ракометарките.
„Ова чувство е неверојатно и неповторливо и доколку по ова не се најде некој да го спаси Вардар, ќе можеме да закачиме патики и да се пензионираме“, додаде Дибиров.
Дел од „црвено-црните“ веќе договорија трансфери и ќе заминат од Скопје – Дејан Милосављев во Фухсе Берлин, Игор Карачиќ во Кјелце, Дмитри Киселев во Чеховски Медведи. Но, засега, не и руското лево крило и до последен момент ќе чека разврска за иднината на клубот иако неодамна напиша проштална порака за збогување со Македонија и вардаровите навивачи.