До 19 часот во 32. дипломатско-конзуларни претставништа на земјава во странство, своето гласачко право на шестите претседателски избори го искористиле 724 гласачи или 46,16 проценти од пријавените 1.781 гласач. Сè уште се отворени шест гласачки места во САД и во Канада каде гласањето трае до 19 часот по локално време, па затоа бројките од таму не се вклучени во оваа излезност.
Како што соопшти вечерва на прес-конференција Љупка Гугучевска, портпаролка на Државната изборна комисија (ДИК), најголема излезеност до 19 часот е забележана во Букурешт 64,29 проценти, Сараево со 78,57 проценти, Брисел 63,27 проценти, Берлин 63,16, додека најниска излезеност е забележано во Рим 28 проценти и Абу Даби 20 проценти.
„Во 13 казнено-поправните установи од 1.640 гласачи, своето гласачко право го оствариле 74,13 проценти од запишаните. Денеска гласаа и седум гласачи кои се водат како внатрешно раселени лица, како и 4.407 граѓани пријавени како болни или немоќни и 12 во куќен притвор. Првпат на овие претседателски избори гласаа и гласачи од два старечки домови во Скопје, каде од 71 гласач своето гласачко право го искористиле 65, односно 91,54 проценти“, рече Гугучевска.
Таа нагласи дека по добиените информации од општинските комисии денешниот изборен ден поминал во мирна атмосфера, без прекини во гласањето и без неправилности.