Само два приговора и едно барање за увид во неважечките ливчиња се пристигнати до попладнево до архивата на Државната Изборна Комисија (ДИК) по десеттите парламентарни избори во земјава.
Приговорите се поднесени од политичката партија „Демократи“ и се однесуваат за неважечките гласачки ливчиња, а пред објавувањето на неофицијалните конечни резултати, партијата „Единствена Македонија“ доставила барање за увид во неважечки ливчиња чиј број по тридното гласање изнесува 31.466.
Рокот за доставување на приговори за постапката за гласање изминува вечерва во 21 часот, а утревечер (сабота) во 19:30 часот ќе заврши и рокот за сумирање и утврдување на резултатите од предвремените парламентарни избори. ДИК вчера со задоцнување ги објави неофицијалните конечни резултати од изборите поради, како што изјави претседателот Оливер Дерковски, хакерски напад на интернет страницата на Комисијата.
Предвремените парламентарни избори се одржаа под посебни услови поради пандемијата со Ковид-19. Се гласаше во понеделникот, ден што беше резервиран за заболените лица со Ковид-19 и во самоизолација, во вторникот кога гласаа болните, изнемоштените, хронично болните и затворениците додека централниот изборен ден беше во средата.
Победник на изборите е коалицијата „Можеме“ предводена од СДСМ со 46 освоени мандати, коалицијата „За обнова на Македонија“ на чело со ВМРО-ДПМНЕ доби 44 пратеници, ДУИ – 15, коалицијата „Сега моќеме“ на Алијанса на Албанците и на Алтернатива -10, Левица – 2 и ДПА – 1.
Дел од партиите учесници на изборите се пожалија на нерегуларности и грешки во сумирањето на резултатите и најавија дека ќе поднесат приговори до ДИК и другите надлежни институции.