Здружението за промоција и развој на инклузивно општество „Инклузива“ и Државната изборна комисија, потпишаа Меморандум за соработка.
„Во пресрет на локалните избори 2017, повторно направивме мало истражување, во соработка со ЦИВИЛ. Во рамки на нивните набљудувачи имавме свои набљудувачи на терен. Сите забелешки се однесуваа во однос на организирање и спроведување на изборите. Ќе се обидеме за следните избори сите препреки да бидат отстранети“, изјави Благица Димиторвска за цивилмедиа.мк.
Таа ја потенцираше потребата од регистар со број на лица со попреченост. Таа нагласи дека во североисточниот регион на Македонија, има околу 1.000 лица со попреченост, со кои здружението е во постојан контакт, но тоа не е реалната бројка, односно потребна е помош од институциите за да се добие јасна слика за колкава е бројката на овие граѓани.
-Денеска заемно се согласивме координирано да работиме во насока на остварување на конкретни цели, зголемување на учеството на лицата со попреченост во изборниот процес.“ изјави Добре Јанчев, генерален секретар на ДИК.
По потпишувањето на Меморандумот, „Инклузива“, ќе продолжи со обука на Стручната служба на ДИК, преку која учесниците ќе се стекнат со вештини за испорачување на обуки за лица со попреченост.
По завршувањето на оваа активност, ќе следат регионални работилници за претставници од општинските изборни комисии, кои ќе се реализираат во текот на месеците април и мај оваа година.
Со реализацијата на овие активности се очекува ДИК да добие тим на обучувачи со специфични вештини за комуникација и испорачување обуки на лица со попреченост.
Ваквиот тим на обучувачи понатаму ќе работи на реализација на целите на Меморандумот за соработка.
Меморандумот е направен во согласност со европското законодавство, Конвенцијата на Обединетите Нации за правата на лицата со попреченост, домашната регулатива и интерните акти.