Премиерот Емил Димитриев утре во 8 часот наутро ќе се сретне со Јоханес Хан, комесар за европска соседска политика и проширување.
Портпаролката на Европската комисија, Маја Коцијанчиќ информираше дека главен настан поради кој Хан доаѓа во Република Македонија е состанокот на министрите за надворешни работи и енергетика/економија од шесте балкански држави (Македонија, Косово, Србија, Албанија, Босна и Херцеговина и Црна Гора).
„Комесарот Хан ќе биде во Скопје во четврток на 9 февруари на состанокот на министрите за надворешни работи и енергетика од шесте земји на Западниот Балкан. Исто така, ќе се разговара за подготовка на Самитот за Западен Балкан, што во јули ќе се одржи во Трст, Италија. На маргините, комесарот Хан, исто така, ќе има и билатерални разговори, меѓу кои и со претставници на сите политички партии на земјата-домаќин – изјави Коцијанчиќ.
Ова е прва посета на Хан по предвремените избори на 11 декември. Последен пат беше во Скопје во октомври кога се разговараше за спроведувањето на изборите.