Средбата на министрите за надворешни работи на Македонија и Грција, Никола Димитров и Никос Коѕијас во Сунио, крај Атина ја отвори вратат за средба на двајцата премиери Зоран Заев и Алексис Ципрас на 17 мај во Софија, на маргините на самитот ЕУ-Западен Балкан.
Медијаторот Метју Нимиц по шестчасовните разговори, без да открива детали, изјави дека тој би ја карактеризирал средбата како сериозна, на неколку пати тензична, на која била завршена многу позитивна работа.
Двајцата министри, како што рече, сега ќе ги брифираат премиерите во своите земји кои треба да се сретнат во Софија на 17 мај.
Нимиц вообичаено не одговараше ниту на новинарските прашања, на кои возврати со тоа дека средбата на Димитров и Коѕијас со негова медијација била подготовка на средбата во Софија.
Очекувања
Претходно, македонскиот амбасадор во Атина, Дарко Ангелов за денешното издание на грчкиот весник „Та неа“, во однос на новата рунда разговори, изјави дека средбата Димитров – Коѕијас – Нимиц ќе игра клучна улога во перспективата за решение во следниот период.
Ангелов, како што пренесе МИА, вели дека постои напредок во преговорите, кои на ниво на министри за надворешни работи се интензивирани во изминатиот период, но сепак остануваат основните разлики.
– Како што изјави и министерот Димитров, во изминатиот период беше забележан напредок во многу аспекти за едно веројатно решение. Сепак, остануваат основните разлики што се однесува на инсистирањето на Грција за промена на нашиот Устав и опсегот за користење на името. Сега влеговме во многу критична фаза за преговорите и средбата на двајцата министри, овој пат со присуство на специјалниот претставник на ОН Метју Нимиц, ќе одигра клучна улога во перспективата за решавање во следниот временски период, вели Ангелов за „Та неа“.
Грчките весници објавуваат наводни сценарија кои се на маса
Грчкиот весник „Та Неоа“ во саботното издание објавува сценарио, кое според весникот има две карактеристики: постигнување договор сега и постепено комплетирање за две години.
– При првото читање, најважниот елемент на оваа верзија на договорот е појавувањето на намерата на соседите да го прифатат за севкупна употреба (ерга омнес) името што ќе се договори (преовладуваат имињата Горна Македонија, Нова Македонија), пишува весникот и коментира дека македонската страна го менува ставот за употреба на уставното име во внатрешноста на земјата.
Според информациите на весникот, договорот не може да биде сега и веднаш туку се дава време, најверојатно две години за имплементација на ерга омнес. Македонската страна сметала, пишува „Та неа“, дека овој временски период од две години е задоволителен за да се направат потребните уставни промени, дали со или без распишување на избори.
И според „Катимерини“ последниве денови меѓу Атина и Скопје се разговара за сценарио според кое, треба да и се даде доволно време на Македонија за да го одобри ерга омнес и да направи уставна ревизија.
– Врз база на ова сценарио, кога ПЈРМ ќе ги одобри овие две предвидени точки, особено важни за Атина, тогаш автоматски соседната земја ќе се приклучи во НАТО и ќе ги започне пристапните разговори со ЕУ (секако, доколку Брисел упати соодветна покана), пишува „Катимерини“.
Според „Катимерини“, за придвижување кон договор, за Грција неопходно е да се исполни условот за името да биде ерга омнес.
– Според Атина, не треба да постои никаков прозорец, па дури и во внатрешноста на ПЈРМ, во кој земјата изолирано ќе го користи терминот „Македонија“. Сѐ ќе треба да упатува на новото име, без разлика дали тоа ќе биде „Горна Македонија“ или некое друго, пишува весникот и додава дека ерга омнес води до промена на Уставот.