Од денешниот собир во Солун е упатена голема порака дека не може да се замисли цела, стабилна и успешна Европа без целосна интеграција на Западниот Балкан, истакна министерот за надворешни работи Никола Димитров во изјава за медиумите на маргините на конференцијата „Од Солун до Загреб“.
„Една голема порака до остатокот на Европа – Европа цела, стабилна, успешна и во мир не може да се замисли без целосна интеграција на Западниот Балкан. Тоа е повик, согласно заклучоците од Европскиот совет во октомври, да се донесат одлуки за пристапните преговори со Северна Македонија и Албанија пред Самитот во Загреб“, изјави Димитров по завршувањето на сесијата на солунската средба насловена „Унапредување на европската интеграција на Западен Балкан: Актуелни предизвици и перспективи“.
Димитров нагласи дека денешната министерска конференција е многу симболична, бидејќи се одржува во Солун по 17 години од првиот Самит во овој град во 2003 година, кога Европа му вети на Балканот дека неговата иднина е заедно со неа во ЕУ.
„Симболично е што сме во истиот град на неколку месеци пред Самитот во мај во Загреб од кој имаме големи очекувања и ова на некој начин е некој мост и важна поддршка од соседите кои се дел од ЕУ – Грција, Бугарија, Романија, Словенија, Хрватска и Италија“, додаде шефот на македонската дипломатија.
Дендиас: Западниот Балкан е инетегрален дел од Европа
Ние европските соседни земји на Западен Балкан потврдуваме дека регионот е интегрален дел од Европа, изјави шефот на грчката дипломатија, Никос Дендиас на отворањето на конференцијата насловена „Од Солун до Загреб“.
Говорејќи на сесијата „Унапредување на европската интеграција на Западен Балкан: Актуелни предизвици и перспективи“, Дендиас нагласи дека Солун е избран за домаќин на Конференцијата затоа што тука во 2003 година е утврдена Солунската агенда, која ги регулираше односоите меѓу ЕУ и Западен Балкан.
„Тука сме и затоа што Солун е крстосница на Истокот и Западот и го поврзува Западниот Балкан со три континети“, додаде Дендиас.
Според него, овој собир се одржува во време кога ЕУ се соочува со глобални предизвици и кога изгуби една своја земја членка, па затоа во овој критичен момент мора да ја задржи европската идеја. Тој потенцира дека политката на проширување важна за надминување на поделбите на континентот, додавајќи дека европската перспектива за земјите од Западен Балкан е во политички и економски интетес на ЕУ и ќе придонесе за зајакнување на единството на Унијата.
Според Дендиас, нема дилеми дека регионот и припаѓа на ЕУ, но западнобалканските земји мора да се посветат на владеењето на правото, почитување на човековите права и зајакнување на демократските институции. Притоа нагласи дека ЕУ мора да ги исполни своите ветувања за интеграција на земјите од регионот, со што ќе се постигне трансформација на Западниот Балкан, негово интегрирање на пазарот во Унијата, создавање поповолна економска клима, намалување на невработеноста, привлекување нови инвестиции и запирање на одливот на мозоци.