Договорот од Преспа претставува дел од меѓународното право, но сега имаме потреба од затворање на ова поглавје со почеток на преговорите за членство во Европската Унија што ќе биде од големо значење за надминување на поделбата кај нашиот народ, вели министерот за надворешни работи, Никола Димитров во интервју за грчка „То Вима“.
„Никола Димитров во својот календар има заокружено цела низа клучни датуми. Но, најважен е 24 март за кога е закажан Советот за општи работи на ЕУ во Брисел и на дневен ред е прашањето за определување датум за отворање преговори со Северна Македонија и Албанија“, пишува „То Вима“ во воведот на интервјуто со Димитров.
Тешко и долготрајно приближување до Европа
Постапката за приближување и за членство во европските асоцијации секогаш била долготрајна и тешка, особено сега бидејќи Северна Македонија се движи кон избори на 12 април. Пред сѐ поради противењето на Франција која во октомври се спротивстави за давање на посакуваниот датум за преговори што предизвика внатрешна криза во земјата и доведе до распишување на предвремените парламентарни избори.
„Се чувствуваме како главниот протагонист на филмот „Groundhog Day“ (Денот на мрмотот) кој треба да направи сѐ совршено за да се разбуди наредниот ден. Не мислам дека сме совршени, ниту една земја не може да биде совршена. Но, верувам дека нашиот случај е силен. Инвестиравме во решавање на тешки прашања, направивме еден демократски пресврт во земјата. Имаме уште работа, но се движиме во вистински правец. Успеавме, исто така, да го затвориме и последното легислативно прашање што беше важно за одредени земји-членки, но и за самите наши граѓани, гарантирајќи го продолжувањето на судските случаи и постоењето на едно тело на јавни обвинители кои ќе се борат против длабоката корупција. Шефот на ова тело ќе се избира од самите обвинители и нема да биде определуван од политичките партии во парламентот“, објаснува Димитров.
Густа програма и предизвици
Погледите сега се свртени кон случувањата во март. Календарот е густ. Во следните денови, најверојатно на 4 март, Европската комисија ќе ги објави Извештаите за напредокот за Северна Македонија и на Албанија. Потоа ќе се спроведат два круга локални избори во Франција на 15 и на 22 март. Овие избори, според многумина, се сметаат како една од причините за тврдиот став на претседателот Емануел Макрон минатата есен. Два дена по вториот круг, на 24 март ќе се одржи критичниот Совет за општи работи.
И доколку министрите за надворешни работи на 27-те земји-членки на ЕУ не успеат да се договорат, сѐ ќе се одлучува на Самитот на шефовите на држави и влади на Европскиот Совет на 26/27 март во Брисел. Француските грижи за методологијата за проширување се смета дека се надминати по објавувањето на предлогот на Комисијата за еден поуверлив начин на контрола на напредокот на земјите кандидати.
„Новата методологија решава одреден дел од загриженоста на земјите-членки и ја содржи можноста за реверзибилност на процесот. Една земја-членка може да ја иницира оваа постапка и се бара квалификувано мнозинство за да се спречи. Се предвидува, исто така, корист за оние кои целите ќе ги исполнат побрзо, како и пристап кон повеќе средства. Доколку кон ова се додаде и претстојниот Извештај во март, тогаш ги имаме елементите за успех. За нас ќе биде многу важно, важно за регионот, но и за самата Европа, бидејќи денешната Комисија има амбиција да биде геополитичка и да игра поголема улога во светските случувања. Ако ЕУ не може да ја направи разликата со Западен Балкан, еден регион опкружен со земји-членки, ќе биде многу тешко да има слични амбиции вон европската географија“, нагласува Димитров.
„НЕ“ за разногласието за Преспа
Внатрешната политичка состојба не е розова. Релевантни анкети нема, при што разликата меѓу двете големи партии, СДСМ на Зоран Заев и ВМРО-ДПМНЕ на Христијан Мицкоски е во рамки на статистичка грешка. Клучен фактор, недвосмислено, ќе биде гласањето на Албанците во земјата, иако последниве денови се забележува еден значаен развој – СДСМ предизборно се согласи на изборната пресметка на 12 април да оди заедно со партијата БЕСА, трета по јачина партија кај Албанците по ДУИ и Алијансата за Албанците.
Неодамнешниот инцидент со сега веќе поранешната министерка за труд и социјална политика, Рашела Мизрахи и отстранувањето на таблата од Министерството на која што пишуваше „Република Северна Македонија“, сепак, ги покажа проблемите што би можеле да произлезат со имплементација на Договорот од Преспа. Министерката која е член на ВМРО-ДПМНЕ беше разрешена, но Димитров е сосема јасен во својот став.
„Треба да бидеме чесни кон народот и искрени кон гласачите. Можеби е легитимно некој да има таква агенда, но истовремено треба да ги имаме предвид и последиците. Не е праведно јавно да велиме дека Договорот од Преспа треба да се поништи, а зад затворени врати да им велиме на странските соговорници дека тој е реалност која што треба да ја прифатиме. ВМРО-ДПМНЕ го гласаше Протоколот за НАТО, но се обиде да ги дискредитира оние кои ги гласаа измените на Уставот. Се спротивставуваат на Договорот од Преспа, но им се допаѓаат резултатите од него“, завршува шефот на македонската дипломатија.
Што се однесува до имплементацијата на Договорот, оценува дека „секогаш можеме подобро“, но позитивно е што може да разговараме за прашања кои произлегуваат со добра волја и без да биде доведена во прашање целата постапка.
„Заедно сме во сето ова и треба да им покажеме на нашите граѓани дека е во интерес на двете страни“, вели министерот Никола Димитров за „То Вима“.