По спроведена вакцинација на 864. 759 лица во нашата земја, кај помалку од 0,03% од извршените вакцинации е пријавен сомнеж за несакана реакција – велат за НОВА ТВ од МАЛМЕД
Околу 260 граѓани или само 0,03 отсто пријавиле сомнеж за несакана реакција од вакцината против ковид-19 од досега имунизирани 864.759 лица и дадени околу 2 милиони вакцини. Првата вакцина против ковид-19 во Македонија е дадена на 19 февруари лани и оттогаш, за една година, до МАЛМЕД (Агенција за лекови и медицински средства) речиси секоја недела стасувале по неколку пријави.
– До Агенцијата за лекови и медицински средства од почеток на вакцинацијата против ковид-19 па се до денес, на неделно ниво пристигнуваат по неколку пријави за несакана реакција од вакцините од сите три дози на вакцина. По спроведена вакцинација на 864 759 лица во нашата земја (согласно официјалните податоци објавени од Министерството за здравство), кај помалку од 0,03% од извршените вакцинации е пријавен сомнеж за несакана реакција. Во текот на 2021 година процентот на пријавените несакани реакции по примена на вакцина против ковид-19 е 0,03% – велат за НОВА ТВ од МАЛМЕД.
Зголемена температура, изнемоштеност, главоболка, најчести реакции
Во врска со тоа кои се најчестите несакани реакции по примена вакцина против коронавирусот, од Агенцијата појаснуваат:
– Најчесто се пријавени несакани реакции со лесна симптоматологија како зголемена телесна температура, изнемоштеност, главоболка, гадење, вртоглавица, болка и оток на местото на апликација и болка во мускули. Сите досега пријавени несакани реакции се опишани во упатствата за употреба на вакцините – велат од Агенцијата за лекови.
Оттаму советуваат – доколку пациентите, корисници на лекот, се посомневаат дека одреден симптом којшто го почуствувале е поврзан со земање/примена на лек кој го користат, треба да постапат на следниов начин:
– Да го прочитаат повторно Упатството за употреба на лекот, бидејќи таму се наведени очекуваните несакани реакции при примена на тој лек, како и препораките како да постапат во случај на појава на сериозни несакани реакции.
– Да се обратат кај нивниот лекар или фармацевт, бидејќи тие ќе им дадат стручен совет за понатамошна примена на лекот за кој се сомневаат дека им ја предизвикал несаканата реакција (на пример: прекинување на употреба на лекот, промена на лек, намалување на доза, продолжување со терапија и др.)
Несаканите реакции од лековите да се пријават во Националниот центар за фармаковигиланца
Граѓаните несаканите реакции од лековите да ги пријават во Националниот центар за фармаковигиланца при Агенцијата за лекови и медицински средства (ул.Св.Кирил и Методиј бр.54 кат 1) или по електронски пат преку веб страната на Агенцијата http://malmed.gov.mk// со пополнување на Оn-line апликацијата за пријавување на несакани реакции за пациенти.
Од Агенцијата за лекови и медицински средства наглсуваат дека имаат договор за соработка со Uppsala Monitoring Centre (UMC) – глобална електронска база на податоци за несакани реакции на лекови на Светската здравствена организација со седиште во Шведска. Сите пријави кои се доставени до МАЛМЕД се обработуваат и проследуваат до UMC и стануваат дел од документацијата за безбедноста на лекот.
Во врска со пријавените два смртни случаи во минатата година, во кои има индиции дека се асоцирани по примањето на вакцина против ковид-19, надлежните се уште немаат нови сознанија од испитувањата.
– Ставот е, апсолутно, дека граѓаните треба да се вакцинираат против ковид-19, а стапката на релаксирање и намалување на мерките секако треба да соодветствува и со опфатот на вакцинација. Односно, релаксирање на мерките не оди со прашањето кога ќе се укинат сертификатите, туку со зголемување на процентот на невакцинирани граѓани. Во нашата земја се аплицирани околу 2 милиони дози, а во светот досега се дадени 10,42 милијарди дози на ковид-вакцини. Во ЕМА (Европска агенција за лекови) процентот на пријавени сомнежи за несакани реакциии не е ниту во проценти, туку помалку, а и нашата стапка (пријавени 0,03 отсто), соодветствува со таа во ЕУ, со тоа што нашите граѓани имаа доверба и ги прифаќаа кинеските и руската вакцина, а во однос на нив не може да споредуваме, бидејќи тие не се регистрирани во ЕМА, а нашите граѓани имаа доверба во нив, вели проф. д-р Грозданова.
Проф. д-р Александра Грозданова
Таа појаснува: „Да, точно е дека има заболени и починати и меѓу вакцинираните лица“.
– Но, апсолутно се потврди дека бројот на смртните случаи и на хоспитализациите е исклучително помал во однос на невакцинираните граѓани. Тоа е и целта на имунизацијата – да има што помалку тешки случаи и смртни исходи. Кога имате респираторен вирус, вие не може да дојдете во ситуација болеста да има друг тек, исто е и со вирусот на грипот, затоа се важни вакцините, додава Грозданова.
Љубица Балабан