Поранешната министерка за внатрешни работи Гордана Јанкулоска, денеска по втор пат е на распит кај судија на претходна постапка како осомничена во случајот „Тврдина“ што го отвори Специјалното јавно обвинителство.

На првиот распит во април, судија на претходна постапка одби да ги прифати барањата на СЈО и да изрече мерка на претпазливост за Јанкулоска и останатите тројца осомничени. Мерка притвор доби само првоосомничениот, началникот на Петта управа во МВР Горан Грујевски, но судот по неколку дена ја преиначи одлуката во куќен притвор. Со одлуката на Претседателот Ѓорѓе Иванов за аболиција, беше укината и таа мерка, а по повлекувањето на помилувањата сега предметот повторно се враќа на одлучување во Кривичниот суд. Се очекува попладне на распит да дојде и првосомничениот Грујовски. СЈО сега повторно ги бара истите мерки за обезбедување на осомничените.

Тврдина – обид да се скријат траги за прислушувањето

Тврдина е третиот предмет што го обелодени СЈО, а во кој се осомничени 5-мина, тројца началници на оддели во УБК, екс министерката за внатрешни работи и вработена во архивата. СЈО смета дека има докази дека групата организирала уништување на два система за следење на комуникации со што државата е оштетена за 10 милиони евра. Уништувањето на системите е извршено минатата година на 28 март во отпад.

СЈО обелодени дека операцијата за уништување почнала порано, откако лани на 25-ти февруари со судска спогодба, вината во случајот Пуч ја признал Ѕвонко Костовски, а судот утврдил дека нелегалното прислушување е вршено со ситемите на МВР. Неколку денови по таа судска пресуда, началникот на Петта управа во МВР Горан Грујевски кој е првоосомничен, почнал да прави  документација и извештаи за да се овозможи „законско“ уништување на системите.

Од Специјалното јавно обвинителство тврдат дека Горан Грујевски, издал усна наредба до други раководители со цел да прикаже дека постои „наводна потреба“ за ништење и бришење од евиденцијата опрема поради техничка застареност. Целта според нив била да прикрие други лица дека неовластено прислушувале

Тој до второосомничениот доставил предлог да се формира Комисија за попис, ништење и бришење од евидениција и од листата на опремата. Истовремено, според СЈО, тој незаконски предложил членови за Комисија за попис на опремата.

По наредба вториот началник доставил Предлог за формирање на Комисија за попис до секторот за правни работи. Иако секторот укажал на недоследности, сепак вториот началник не дал појаснување, со цел да скрие дека ќе се уништуваат и два система за следење на комуникациите. Иако не добиле појаснување, од Секторот го изготвиле решението по напатствијата дадени од министерката Јанкулоска.

„Кон крајот на март минатата година, министерот за внатрешни без да ги земе предвид законите за постапување со класифицирани информации, без барање на сите организации во УБК, формирала Комисија за попис, расходување, ништење и бришење од евиденцијата и од листата на задолжување на системи и техничка опрема во Управата за безбедност и контраразузнавање. Јанкулоска не зела в предвид ниту дали избраните членовите на Комисијата се поставени согласно закон.“ посочи обвинителката Ристовска.

Веднаш потоа формираната Комисија ја попишала опремата. Се работи за системи од кои едниот бил исклучен уште во 2008, додека останатиот се уште работел. Лицата задолжени за ракување со системот за следење на комуникации го исклучиле системот за следење на комуникации кој тогаш бил во употреба. Акцијата за прикривање на трагите продолжила и во текот на целата 2015 година, а се одвивале и до средината на март годинава.

Според СЈО, казнивоста за кривичното дело злоупотреба на положба и овластувања и нивно пречекорување се движат од 5 до 20 години, а оттаму велат дека тие истрагата ја темелат врз основа на бројни материјални и вербални докази. Дополнително ќе се истражува дали во случајот инволвирани се и други службени лица.

Коста Крпач сведочел за „Тврдина“

Коста Крпач, директорот на компанијата„Финзи ДООЕЛ“, кој официјално изврши самоубиство беше клучниот сведок за случајот„Тврдина“.

Тој доброволно се пријавил во СЈО, а исказот бил во врска со незаконското уништување на двата система за прислушување.

СЈО соопшти дека против Крпач не била водена никаква кривична постапка и тој немал својство на осомничено лице, туку на сведок и затоа зачуди фактот што и тој се најде на списокот на аболирани на Претседателот Ѓорѓе Иванов.

Од СЈО посочија дека поседуваат докази за многу релевантни околности, вклучително и за притисокот под кој се наоѓал Крпач, но бидејќи се работи за исклучително доверливи информации тие не може да ги споделат во јавноста.

Освен Крпач на листата на Иванов се наоѓаат и Владислав Стајковиќ и Христијан Панев – лица кои се поврзуваат со бомбата број 15, односно со набавката и митото за израелската опрема за прислушување.

Јанева веќе го побара случајот „Израелска опрема“ во којшто осомничен за поткуп е Сашо Мијалков, а вмешан е и Владислав Стајковиќ, но за овој предмет не е обелоденета истрага од Специјалното обвинителство.

Јанкуловска: Сосема сум спокојна, немам кривични дела