Ирачката јавност, конечно, дочека убава вест од ФИФА. Светската фудбалска асоцијација одобри организација на официјални меѓународни натпревари на територија на земјата, поточно, во Басра, град на југот на земјата, во рамки на квалификациите за Светското првенство во Катар во 2022 година.
„Според безбедносните проценки на ФИФА, Басра може да биде град домаќин на мечевите на репрезентацијата на Ирак“, се наведува во соопштението на фудбалската централа во Цирих.
Првиот натпревар на домашен терен по подолга пауза, ирачките репрезентативци ќе го одиграат на 10 октомври против Хонг Конг на стадионот што се градеше од 2009 година до 2013 година и има капацитет од 65.227 места.
Ирак во последните години како домаќин играше во Иран, во Јордан или во Малезија поради воените дејствија и лошата безбедносна состојба во земјата. Истовремено, ФИФА нагласи дека будно ја следи состојбата и во Хонг Конг каде во тек се демонстрации, а таму на 10 септрмври треба да гостува Иран.