В.д директорот на Македонскиот народен театар, Драган Спасов – Дац и Оливер Митковски – еден од актерите кои вчера ја напуштија претставата Ничија земја денеска на „Фејсбук“ ги образложија своите постапки. Дац и се извини на публиката за откажаната претстава Ничија земја и рече дека ништо не смее да биде поважно од публиката, додека Митковски смета дека нивната одлука била емотивна, но човечка.
„Ова го почувствував како атак кон мене и кон нашата публика“, напиша Дац.
Тој најави дека сите актери што одлучиле претставата да не се одржи ќе бидат казнети за своите постапки.
„Пријатели и љубители на театарот, денеска се случи нешто што не смееше да се случи. Се откажа претстава во МНТ. Покрај мојата сугестија и наредба да се игра претстава, глумците своеволно одбија да ја играат претставата ‘Ничија земја’, како поддршка за приведените глумци кои беа инволвирани во случувањата од 27 април во Собранието. Сите до еден ќе бидат казнети за непослушноста и по разговорот со мене свесни се за проблемот кој го направија“, напиша Дац на Фејсбук.
По ова, на „Фејсбук“ се огласи и еден од актерите во претставата, Оливер Митковски. Тој напиша дека нивната постапка не била со цел да влијаат на исходот на судските процеси, туку да се сврти вниманието на институциите и да ја вратат одлуката Јовановски да биде во куќен притвор, наместо во затворот во Шутка.
„Во случајов поради недостаток на вистински информации за мотивите на нашето дејствување а истовремено поради чувствителноста на политичката состојба во земјата пред се поради низата организирани криминални дејствија од 27 Април, јавноста со право шпекулира и бара одговори. Верувам дека на повеќето им се добро познати моите ставови во однос на владеењето на претходната политичка гарнитура, мојата осуда во однос на случувањата во собранието и мојата децениска борба за создавање на правна држава. Оттаму, нашата одлука не беше обид ниту да влијаеме на исходот на судските процеси, ниту да бараме амнестија за сторените дела. Напротив, сметаме дека доколку се докаже вината, Владо и сите останати учесници треба соодветно да бидат казнети, секој во зависност од тежината на стореното дело. Идејата беше да се сврти вниманието на јавноста и пред се на надлежните институции уште еднаш да ја преиспитаат својата одлука и да ја вратат првичната-домашен притвор. Сметаме дека во конкретниов случај, Владо има неколку олеснителни околности кои се доволни за оваа отстапка од страна на надлежните органи“, пишува Митковски.
Тој вели дека нивната одлука е емотивна, можеби по некои параметри и погрешна но во секој случај сметаат дека е човечна.
„Можеби ќе видите извесни контрадикторности во однос на целото мое претходно залагање, жалам што дел од моите пријатели и познаници ќе бидат разочарани но за мене одлуката да застанам зад оваа иницијатива е во суштина континуитет на мојата потреба да бидам не само колега туку пред се човек“, вели актерот.