Државјанин на С. Македонија, по кого била распишана меѓународна потерница од македонските власти, бил уапсен од албанската полиција на пристаништето во Драч, при обид да ја напушти албанската територија.

На излез на граничниот премин во Драч, службите на граничната полиција, како резултат на зголемените мерки и размена на информации со Интерпол Тирана, го приведоа М.О. (32) државјанин на Северна Македонија, баран со меѓународна потерница, стои во полициското соопштение.

Се наведува, исто така, дека за време на обработката и верификацијата на податоците во системот, ова лице се покажало како меѓународно барано лице, откако Судот против организиран криминал и корупција во С. Македонија го осудило на четири години затвор за кривично дело „илегална организација на имиграција“.

Полицијата информира дека на крајот од истражните дејствија на стручните лица на одделот за истраги на криминал при полицискиот комесаријат Драч, извршиле привремено апсење на ова лице, со цел негова екстрадиција во Северна Македонија.

Ова е последователен случај во кој албанската полиција апси македонски државјанин баран со меѓународна потерница.

На 19 јули, на преминот Тушемиште – Свети Наум на албанско – македонската граница, при влез во Албанија ја уапси А.М. (35) жителка на Охрид, барана со меѓународна потерница издадена од норвешките власти, поради „семејно насилство и киднапирање“.

Претходно на 11 јули, на граничниот премин Ќафасан кај Струга, при обид за влез на албанска територија, беше уапсен Ф.В. (39), жител на село Велешта, против кого шестиот федерален кривичен суд во Рио де Жанеиро, Бразил, издал налог за апсење за кривично дело „трговија со наркотици“.

Три дена подоцна на преминот „Морина“, пак, на албанско-косовската граница, кај Кукс, службите на албанската гранична полиција, го уапсија Џ.Ф. (38), жител на Скопје, баран со меѓународна потерница, за кривични дела „кражби“ и „трговија со наркотици“, распишана од белгиските власти.