Двочасовната средба меѓу Демократската Унија за Интеграција (ДУИ) и Алијансата на Албанците заврши, работните групи се разотидоа. Зад нив оставија дилеми за што конкретно разговараа и дали нешто конкретно договорија. Наместо тоа, по кој знае кој пат, испратија општа порака во завиена форма дека на маса била заедничката платформа како услов за коалицирање со партија од македонскиот политички блок во идната Влада.
Според Арбен Таравари од Алијанса на Албанците, средбата минала во конструктивна атмосфера. Приликата ја искористи за повторување на ставот за важноста од исполнување на сите точки од документот без притоа да прави разлика кој би формирал Влада. И едните и другите избегнаа да кажат дали предлозите на претседателот на СДСМ, Зоран Заев, биле предмет на опсервација на бипартитната средба.
„Средбата на работните групи беше во духот на платформата и мина во конструктивна атмосфера. Разменивме ставови и разговаравме за сите точки за кои сметаме дека се важни. Исто така можам да ја третирам средбата како конструктивна бидејќи отворено разговаравме за тие точки што се многу важни и особено оние точки што доближуваат Македонија кон НАТО и ЕУ“, порача Теута Арифи од ДУИ.
Интегративците на средбата учествуваа на потпретседателско ниво. Во отсуство на лидерот Али Ахмети, нивните претставници беа Теута Арифи (градоначалничка на Тетово), Невзат Бејта (градоначалник на Гостивар) и Иџет Меџити (градоначалник на Чаир).