Нови три лица В.Н.(45) Д.П. (33) и В.Ц. (33) се приведени синоќа и се сомничат за кривични дела „учество во толпа, што ќе спречи службено лице во вршење на службено дејствие“ (В.Н) и „учество во толпа што ќе изврши кривично дело“(Д.П.) и (В.Ц.), соопштија денеска од Министерството за внатрешни работи. Според информациите В.Н. е сослушан од судија на претходна постапка и му е одредена мерка притвор во траење од осум дена.
Од МВР информираат и дека синоќа во полициската станица Кисела Вода сам се пријавил и В.Т. (40) осомничен за „учество во толпа што ќе изврши кривично дело“.
„До овој момент на сила се уште централни расписи за осум лица, по кои полицијата трага. Досега од 12 приведени, на шестмина им е изречена мерка притвор во траење од по осум дена, за едно лице мерка домашен притвор, а за две лица мерка – претпазливост“, велат од МВР.
Како што претходно соопштија од МВР, СВР Скопје во координација со ОЈО Скопје досега поднесе кривични пријави за 20 идентификувани лица учесници во нередите во парламентот.
„Покрај ова до ОЈО Скопје поднесени се извештаи за досега собраните сознанија околу лица организатори на протестот, како и лица кои што учествувале во отстранување на претходно поставената блокада на вратата од внатрешната страна од главниот влез на собраниската зграда“, велат од МВР.
Од Министерството информираат и дека продолжуваат со детална истрага за експлозивната направа што вчера беше откриена на првиот кат во зградата на Собранието. Експлозивната направа била направена од плинска боца од 300 милилитри на која со селотејп биле залепени петарди.