Меѓународниот аеродром во Скопје и аеродромот „Свети Апостол Павле“ во Охрид од утре повторно ќе бидат ставени во функција. За 6 часот наутро од главниот град ќе полета авион на „Визер“ за Бремен, а три часа подоцна се очекување да слета и авион на „Туркиш Ерлајнс“ од Истанбул. Првите авиони од Охрид се најавени за четврток.

Патниците, согласно донесените Протоколи за заштита од Ковид-19, ќе минуваат низ строги контроли. Оние што планираат да патуваат, се обврзани да бидат на аеродромите на три часа до летот, забрането е влегување во аеродромската зграда на роднини на патниците, а ограничено ќе биде и користењето на чекалницните.

Дезинфекција на рацете ќе биде задолжителна при влез во аеродромот по што ќе следува и мерење на телесна температура со термална камера. Оние кои ќе бидат сомнителни на медицинските тимови, ќе бидат спроведени во просторија за изолација. Заштитната маска на лице ќе биде задолжителна за време на целиот престој во внатрешноста на објектот.

Авио-компаниите нема да воведат рестрикции на летовите, како што се споменуваше претходно за средното седиште во авионот да биде празно.

„Тоа не е одржливо, бидејќи ќе ги зголеми трошоците, а со тоа и цената на билетите. Од таа причина, авио-компаниите нема да одат со таква забрана, па сиот капацитет на авионите ќе биде ставен на располагање. Од патниците ќе биде побарано да ги носат маските со хепа филтри што блокираат 99,5 отсто од вирусите и бактериите“, порача генералниот директор на „ТАВ Македонија“, Алпер Ерсој.

Македонија во петокот ги отвори своите копнени граници и дозволи влез во земјата за сите без ПЦР тест. Но, македонските државјани засега може да патуваат без задолжителен тест и карантин само во Србија, во Албанија, во Турција и на Косово.