Шкендија ја понижи Ренова со 6:1 во воведниот меч од 17. рунда во домашното фудбалско првенство. По два гола постигнаа Бесарт Ибраими и Ферхан Хасани, по еден потпишаа Стенио Жуниор и Шефит Шефити за „црвено-црните“, почесниот за номиналните домаќини беше дело на стоперот Ненад Мишковски.
Фудбалската битка за Тетово честопати во минатото била играчки неизвесна и резултатски тесна. Но, времињата се променија, па последното издание на градското дерби под Шара се претвори во еднонасочна претстава во која вицепрвакот од минатата сезона и лидер на табелата во тековната се потврди како фаворит во секој сегмент.
Голеадата на „Еколог арена“ ја отвори Бесарт Ибраими. Репрезентативниот напаѓач на Македонија се впиша во листата на стрелци по само три минути игра, а се додаде во неа и пола час подоцна. Сигурен егзекутор на најстрога казна во меѓувреме беше и капитенот Ферхан Хасани кој погоди и во 88 минута, Бразилецот Стенио Жуниор реализира во 48 минута, а Шефит Шефити во 81. Се што успеаја да сторат „сино-белите“ беше погодокот на централниот дефанзивец Мишковски на самиот почеток на вториот дел.
За утре од 13 часот се закажани уште три меча од 17. коло. Пелистер ќе биде домаќин на Шкупи, Силекс на Работнички, а во дербито на дното Скопје ја дочекува Победа. Поради настапот против Зенит во Санкт Петербург, Вардар својот дуел против Академија Пандев ќе го одигра на 10 декември.