Килијан Мбапе си обезбеди место во фудбалската историја иако има само 19 години. Членот на ПСЖ постигна два гола за Франција во победата над Аргентина (4:3) во осминафиналето и стана само втор тинејџер со таков учинок на еден меч на Светските првенства. Последен што успеал во тоа беше легендарниот Бразилец Пеле на завршниот турнир во 1958 година.
Напаѓачот на „триколорите“ остави силен впечаток во воведниот натпревар од нокаут фазата на мундијалот. Покрај двострелот, со леснотија ги надмудруваше и претрчуваше противничките фудбалери и влезе во очи на присутните на „Казањ арена“ уште од самиот почеток на средбата што слободно може да ја прогласиме за „убавица“ на турнирот.
Мбапе најпрво изнуди пенал во 11 минута, во второто полувреме искористи мешаница во казнениот простор на „гаучосите“ и по вторпат го матира Армани за 3:2 на Франција, а во 68. минута му остави топка на Жиру за запечатување на судбината на дружината на Лионел Меси.