Хрватската ракометна репрезентација драстично го поправи впечатокот од мечот со Белорусија и запиша нова победа во главната фаза на Европското првенство. Пред налетите на „коцкестите“ во, вечерва, полната „Загрепска арена“ падна Норвешка со 32:28 (15:13) со што бодовно се израмнија со Франција („триколорите“ имаат меч помалку) и опстанаа на курсот за полуфинале на турнирот.
Впечатокот на свежина и решителност што составот на Лино Червар го остави уште на почеток даде резултат. Хрватите тргнаа силно, во текот на сите 60 минути беа во предност и не оставија ниту трошка надеж за скандинавскиот ривал за расипување на победничката атмосфера и енергија што ја впиваа од трибините.
Во „будењето“ на домашните ракометари се вклопи и чуварот на мрежата Иван Стевановиќ кој со своите феноменални 14 одбрани им овозможи на колегите да се дадат во резултатско бегство и вгради голем удел во втората победа на Хрватска во групата 1.
Мануел Штрлек беше прв стрелец во хрватскиот тим со шест гола, а го доби и признанието играч на натпреварот. „Вардарецот“ Лука Циндриќ погоди пет пати во противничката мрежа, еден погодок помалку од него реализира Марко Мамиќ. Норвежанецот Сандер Сагосен, пак, беше најефикасен ракометар на средбата со осум гола.
Франција во првиот меч од саботната програма ја совлада Шведска со 23:17 и, речиси, е сигурен полуфиналист на 13. Европско ракометно првенство со оглед дека на „триколорите“ им преостануваат уште дуели со Србија и Белорусија до крајот на главната групна фаза.
Најпрецизен во ростерот на Дидие Динар беше Седрик Сораиндо со пет гола, Кентин Мае додаде четири, а Мишел Гигу, Валентин Порт и Никола Клер постигнаа по три. Но, најголеми заслуги за триумфот на „триколорите“, сепак, одат на сметка на голманот Венсан Жерар кој со 19 интервенции беше прогласен и за човек на натпреварот.
ЕП во ракомет
Група 1 (Загреб), 4 коло
Хрватска – Норвешка 32:28
Шведска – Франција 17:23
Табела: Франција 6 (-1), Хрватска 6, Норвешка 4, Шведска 4 (-1), Белорусија 0 (-1), Србија 0.
Идно коло: Србија – Франција (понеделник, 18.15 ч.), Шведска – Белорусија (понеделник, 20.30 ч.)
Двојки за утре (недела) на ЕП
Група 2 (Вараждин), 4 коло
Германија – Данска (18.15 ч.)
Македонија – Шпанија (20.30 ч.)
Табела: Данска 4, Германија 4, Македонија 3 (-1), Шпанија 2 (-1), Чешка 2, Словенија 1.