Четири македонски ракометни претставници, по два во машка и женска конкуренција, денеска добија ривали за воведните настапи во клупските натпреварувања на Европската ракометна федерација (ЕХФ) за сезоната 2017/18.
Охрид 2013 ќе учествува во Купот на ЕХФ, ќе почне од првото коло во кое ќе игра двомеч со екипата на КРАС Волендам. Охриѓани се домаќини во првата средба (2-3 септември), реваншот е седум дена подоцна во Холандија. Подобриот од двата дуела во наредното коло ќе оди на мегдан со Порто.
Еурофарм Работник ќе се појави во Челинџ купот и поради рејтингот ќе стартува од третото коло во кое за ривал го има Гранис Карис од Каунас. И битолчани ќе играат на домашен терен (18-19 ноември) во воведните 60 минути, возвратната средба е на литванско тло на 25-26 ноември.
Двата женски репрезента, пак, се најдоа во ждрепката за Челинџ купот. И Металург и Куманово ќе тргнат од третото коло во кое тимот од Автокоманда ќе се пресмета со Ринкон Фертилидад Малага, а кумановки наспроти себе ќе го имаат Лублин за кој потпиша Елена Петковска. Првите натпревари ќе се одиграат на терен на шпанската, односно, полската екипа.
Куп на ЕХФ (м)
Прво коло: Охрид 2013 – КРАС Волендам (2-3 септември/9-10 септември)
Челинџ куп (м)
Трето коло: Еурофарм Работник – Гранитас Карис од Каунас (18-19 ноември/25-26 ноември)
Челинџ куп (ж)
Трето коло: Ринкон Фертилидад Малага – Металург (11-12 ноември/18-19 ноември); Селгрос Лублин – Куманово (11-12 ноември/18-19 ноември)