Најмалку 39 лица загинаа во експлозија што денес се случи во близина на конвојот со автобуси кои чекаа да влезат во сирискиот град Алепо, јавува сириската телевизија, додека Опсерваторијата за човекови права наведува дека во експлозијата загинаа најмалку 24 луѓе.

Според неименувани извори, во експлозијата загинале и 20 бунтовници, кои ги чувале автобусите како и десетина луѓе во автобусите, пренесува АП.

Експлозијата се случи во областа Рашидин, недалеку од Алепо, покрај десетина автобуси во кои воглавно се наоѓаа шиите евакуирани од две сириски села.

Најверојатно станува збор за самоубиствен напад и дошло до експлозија на автомобил – бомба во близина на конвојот.

Над илјада Сиријци, кои вчера беа евакуирани од четири сириски села, беа блокирани на патот, ден откако ги напуштија своите домови, со што договорот за евакуација е под знак прашање.

Според наводите на француската агенција АФП, околу 5.000 луѓе се уште чекаат транспорт.

Сириската Црвена полумесечина им подели на луѓето од Рашидин храна и вода, каде има околу 3.700 жители.

Луѓето минатата ноќ ја поминаа во автобуси во Рамуши.

Сириската опсерваторија за човекови права соопшти дека конвоите се блокирани, бидејќи бунтовниците се жалеле дека евакуацијата на луѓе од Фуе и Кефрај, кои се под контрола на владините сили, е прекршен договорот а евакуација.

Повеќе од илјада луѓе од две шиитски села под контрола на бунтовниците од северозападна Сирија беа евакуирани вчера со автобуси, додека над стотина бунтовници го напуштија градот во близина на Дамаск со своите семејства, по договор постигнат меѓу владата и бунтовниците.

Како што пренесува БИ-БИ-СИ повеќе од 30.000 луѓе ќе бидат преселени.