Еквадор ги отфрли тврдењата на Викиликс дека планира исфрлање на основачот на организацијата Џулијан Асанж од амбасадата во Лондон и таквите вести ги нарече „лажни“ што имаат за цел да го поткопаат достоинството на земјата. Во соопштение објавено синоќа, Министерството за надворешни работи на Еквадор демантира дека има договор со Велика Британија за апсење на Асанж.
„Ширејќи такви вести, барателот на азил и неговите соработници уште еднаш изразуваат неблагодарност и непочитување кон Еквадор“, соопшти Министерството.
Британската полиција вчера распореди вооружени припадници пред еквадорската Амбасада во Лондон, откако на профилот на Викиликс на Твитер беше објавено сознание од високи извори дека основачот на организацијата Џулијан Асанж би можел да биде исфрлен од објектот „во наредните часови или денови“. Локалните медиуми јавија дека ситуацијата во Амбасадата е мирна и оти ниту еден нејзин вработен, ниту британските власти не го коментираа статусот на Твитер.
Лондонската полиција соопшти дека нема промени во полициската процедура. Во соопштението се додава дека има активен налог за апсење на Асанж и оти полицијата „има обврска да постапи по тој налог доколку тој ја напушти Амбасадата“.
Британскиот министер за надворешни работи Џереми Хант потоа изјави дека Асанж е „слободен човек“ и кога ќе одлучи може да ја напушти Амбасадата на Еквадор во Лондон.
„Тој може да ја напушти Амбасадата кога ќе посака и ние сакаме таа ситуација да се реши што побрзо“, рече Хант.
Секојдневната полициска стража пред Амбасадата беше укината во октомври во 2015 година по три години од поставувањето и се премина на она што полицијата го нарече „прикриено“ дејствување.
Асанж е во еквадорската Амбасада од август во 2012 година, откако се засолни поради страв дека британските власти ќе го уапсат и екстрадираат во САД кои го бараат за објавување на илјадници тајни воени и дипломатски документи.