Србија и Шпанија се последните репрезентации што обезбедија пласман на младинско европско фудбалско првенство во Полска во 2017 година. Норвешка, во Драмен, го совлада северниот сосед со 1:0 во реванш баражот, но популарните „орли“ ќе бидат дел од завршниот турнир благодарение на триумфот со 2:0 во првата средба. Шпанија, пак, одигра 0:0 во возвратните 90 минути со Австрија што, сепак, ѝ беше доволно за полска виза по ремито (1:1) во воведната пресметка.
Место на ЕП 2017 на почетокот на октомври осигураа првопласираните селекции во деветте квалификациски групи меѓу кои беше и Македонија. Покрај нашиот национален тим, најдобри во своите конкуренции беа уште Чешка, Данска, Англија, Германија, Италија, Португалија, Полска, Словачка и Шведска.
Ждрепката за формирање на трите групи на ЕП 2017 е закажана на 1 декември во Краков. Победниците во нив и најдобрата второпласирана селекција ќе продолжат во полуфинале. Мечевите ќе се играат во шест града (Кјелце, Лублин, Гдинија, Бидгошч, Тихи и Краков). Турнирот ќе почне на 16 јуни и ќе трае до 30 јуни.