Шпанија и Германија ќе играат за титулата на Европското првенство за фудбалери до 21 година во Полска. „Фуријата“ во полуфиналето ја совлада Италија со 3:1, а младите „панцери“ го добија пенал рулетот против Англија со 4:3.
Шпански херој на стадионот на Краковија во Краков беше Саул Нигез. Играчот на мадридски Атлетико постигна хет-трик во период од 21 минута во второто полувреме, „азурите“ во меѓувреме останаа без исклучениот Галјардини и беа немоќни да избегнат пораз на крајот.
Нигез го почна голгетерското шоу во 53 минута по додавање на Себалјос, во 65 минута го принуди Донарума на втора капитулација (асистент Делофеу), а печат на триумфот стави во 74 минута по пасот на Асенсио. Единствениот погодок за Италијанците беше дело на Бернардески во 62 минути.
Германците, пак, во првото полуфинале беа подобри пеналџии од нивните англиски врсници. По два гола реализираа двете селекции во основните 90 минути. Греј во 41 минута и Абрахам во 50. погодија за тимот на Ботројд, Селке во 35 минута и Плате во 70. за составот на Кунц.
Мрежите мируваа во двете продолженија што следуваа, па одлуката за прв финалист на турнирот падна по удари од белата точка. Низата ја завршија со еден промашен удар наспроти двата на Англија за голема радост на крајот.
Големото финале е закажано во петок во Краков со почеток во 20,45 ч.
ЕП 2017 за фудбалери до 21 година
Полуфинале
Шпанија – Италија 3:1
Англија – Германија 2:2 (3:4 на пенали)