Репрезентацијата на Израел со импресивен кам-бек ја прослави првата победа на европскиот шампионат во кошарка. Домаќинот на групата Б, во рамки на третото коло, ја совлада Германија со 82:80 (по четвртини – 23:18, 20:25, 14:26, 25:11) и во голема мера го поправи впечатокот по малиот број постигнати поени против Италија и тесниот пораз од Литванија.
Триумфот на Израелците е рамен на подвиг ако се има предвид дека во последна четвртина имаа негатива од 16 поени. Меѓутоа понесени од преполната арена и трио расположени кошаркари направија нешто што се чинеше невозможно. Заиграа цврсто во одбрана, го принудија противникот на грешки и удари од неизградени позиции и успеаја „дебелиот“ минус да го претворат во тенок и сладок плус.
Ричард Хаувел имаше ефект од 23 коша, девет скока и седум освоени топки, Омар Каспи заврши со дабл-дабл учинок (20 поени, 11 скока), а Га Пнини додаде 15 во неверојатното враќање на израелскиот национален тим на 28 секунди до крај на средбата. Лидер во германскиот тим беше Денис Шредер со 20 поени, седум асистенции и три „украдени“ топки, одлична вечер и за Даниел Тајс кој забележа по 15 коша и скокови и три блокади.
Финците како претплатени на екстра баскет – по продолженија ја совладаа и Полска
Финска, еден од ко-домаќините на ЕП 2017, како да е претплатена да игра продолженија во Хелсинки. По изненадувачката победа над Франција на стартот низ екстра баскет, Финците на идентичен начин ја совладаа и Полска во третото коло во групата А со 90:87 (по четвртини – 18:8, 18:24, 16:20, 14:14/во продолженија – 24:21).
Лаури Марканен со 27 коша и девет скока, Петери Копонен со 20 поени беа предводници на финскиот состав до втора победа во групата. Еј Џи Слотер, пак, беше најефикасен кај Полјаците си 18 коша.
ЕП 2017 во кошарка – Финска, Романија, Израел, Турција
Група А (Хелсинки), 3 коло
Финска – Полска 90:87 – по продолженија
Словенија – Грција 78:72
Франција – Исланд 115:79
Табела: Словенија 6, Франција 5, Финска 5, Полска 4, Грција 4, Исланд 3.
Група (Тел Авив), 3 коло
Германија – Израел 80:82
Литванија – Италија 78:73
Грузија – Украина 81:88
Табела: Италија 5, Германија 5, Литванија 5, Грузија 4, Украина 4, Израел 4.