Финска важеше за потенцијална „нагазна мина“ пред 40. Европско првенство во кошарка, а таквиот статус го потврди уште на стартот. Домаќинот на групата А во првото коло ја совлада Франција со 86:84, по продолженија, по нерешените 72:72 во основните 40 минути во Хелсинки.
Победничкиот кош за Финците го постигна Џамар Вилсон, екс играч на белградски Партизан, на 26 секунди до крајот на средбата што ја заврши со вкупно 12 поена и шест асистенции. Лидери во скандинавската селекција беа Лаури Марканен со 22 коша, по 14 уфрлија Салин и Коти. Најефикасен на теренот беше Еван Фурние со 25 поени, Нандо де Коло постигна 21 и запиша шест додавања, но не успеа да погоди и тројка за победа во последните моменти.
Грција ја забележа најубедливата победа во првиот натпреварувачки ден. Двократниот европски првак го „прегази“ Исланд со 90:61, а Словенија беше подобра од Полска со 90:81 во уводниот меч на шампионатот.
Грузијците го слават Шенгелија, Италија го запре Израел на 48 поени
Изненадување и во групата Б во Тел Авив во која Грузија ја совлада Литванија со 79:77 (по четвртини – 18:18, 16:21, 25:18, 20:20). Најголеми заслуги притоа имаше Тока Шенгелија кој постигна 29 поени, Санадзе учествуваше со 13 коша додека Диксон вгради 12 во големиот триумф на Грузијците. Кузмунскас со 18 коша и Калниетис со 15 се издвоија кај поразената селекција.
Италија му одржа час по игра во дефанзива на Израел. „Азурите“ го поразија домаќинот на групата Б со 69:48 (по четвртини – 21:15, 15:17, 15:9, 18:7). Германија, пак, на погон на Денис Шредер ја совлада Украина со 75:63.
ЕП во кошарка – Финска, Израел, Романија, Турција
Група А (Хелсинки), 1 коло
Франција – Финска 84:86 по продолженија
Исланд – Грција 61:90
Словенија – Полска 90:81
Група Б (Тел Авив), 1 коло
Италија – Израел 69:48
Литванија – Грузија 77:79
Германија – Украина 75:63
Денеска на ЕП 2017
Група Ц (Клуж), 1 коло
Унгарија – Хрватска (14 ч.)
Шпанија – Црна Гора (16,45 ч.)
Романија – Чешка (19,30 ч.)
Група Д (Истанбул), 1 коло
Белгија – В. Британија (13,15 ч.)
Србија – Летонија (16 ч.)
Турција – Русија (20 ч.)