Италија и Германија со максимален ефект на Европското кошаркарско првенство по вторите настапи во групата Б во Тел Авив. Двете репрезентации се потврдија како фаворити во денешните дуели во кои го направија, можеби, решавачкиот исчекор кон Истанбул каде се планирани нокаут фазите на 40. издание на турнирот.
По кошаркарскиот час „игра во дефанзива“ што го одржаа на Израелците во првото коло, „азурите“ попладнево ја совладаа и Украина со 78:66 (по четвртини – 16:19, 27:14, 16:15, 19:18) за преземање на врвот на табелата во Б конкуренцијата.
Украинскиот состав покажа заби само во првата четвртина која Италијанците уфрлија во повисока брзина и безбедно пловеа кон втора победа на ЕП 2017. Ако Марко Белинели важеше за енигма колку и што може во тимот на Еторе Месина пред стартот на натпреварите, сега се профилира во лидер на нациионалниот тим. Беше одлично шутерски расположен, „испали“ шест тројки од 12 обиди и со вкупно 26 коша заврши како најефикасен на средбата. Арадоре постигна 13 поени, по 12 додадоа Филој и Датоме. Прв стрелец кај поразениот тим беше крилниот центар, Артјом Пустовји.
Германците ја „спуштија на земја“ Грузија по победата над Литванија
Германија ја совлада Грузија со 67:65 (по четвртини – 19:19, 22:17, 14:16, 12:5) за рамо до рамо со Италија по две кола во Тел Авив. „Панцерите“ го направија невидлив сопствениот кош за противникот, одиграа одлична одбрана во последната четвртина, примија само 5 коша што со постигнатите 12 и трите залиха од претходно им беа доволни за втор триумф на шампионатот.
Денис Шредер и овојпат беше најзабележителен германски кошаркар со 23 поени, Робин Бенцинг уфрли 11 колку и Тока Шенгелија за репрезентацијата на Грузија.
ЕП 2017 во кошарка
Група Б, 2 коло
Украина – Италија 66:78
Грузија – Германија 57:67
Израел – Литванија (20,30 ч.)
Табела: Италија 4, Германија 4, Грузија 3, Украина 2, Литванија 1 (-1), Израел 1 (-1).