Македонската машка одбојкарска репрезентација попладнево (18 ч.) во Тампере ќе игра против Финска во премиерниот настап на 32-то Европско првенство. „Црвено-жолтите“ по вторпат ќе учествуваат на континенталните собири и по вторпат ќе се соочат со финските одбојкари кои на ЕП 2019 славеа со 3:1.
Финска не е подобра репрезентација од нас, но сè ќе зависи од нашата верба, храброст и зрелост. Го гледав првиот натпревар со нив и навистина загубивме на ситни работи, а во нашата игра има можност за напредок уште 20 или 30 проценти. Доколку успееме да се подобриме за 10 проценти, мислам дека ќе ги победиме, изјави капитенот на македонската одбојкарска репрезентација Никола Ѓорѓиев спроти вечерашниот дуел.
Во второто коло македонските одбојкари ќе играат против Холандија (3 септември, 20 часот), во третото против Турција (5 септември, 14 часот), додека противник во четвртото коло ќе биде репрезентацијата на Шпанија (6 септември, 17 часот). Македонската репрезентација ќе ги комплетира настапите во групната фаза на 8 септември со меч против Русија од 17 часот.
Ко-домаќини на Европското првенство се Финска, Естонија, Полска и Чешка, а финалето е закажано за 19 септември во Катовице.