Турција се бори со најтешките шумски пожари во својата историја, изјави претседателот Реџеп Таип Ердоган по проширување на огнената стихија и на термоелектрана во југозападниот дел на земјата.
– Вакви пожари сме немале во нашата историја. Ова се досега најголемите, рече Ердоган во телевизиско интервју.
Поради високите температури и силните ветрови, пожарите принудија илјадници Турци и странски туристи да ги напуштат своите домови и хотели на брегот на Егејското Море и на Медитеранот. Осум лица го загубија животот во пожарите од минатата недела.

Авиони и десетици хеликоптери се придружија на пожарникарите кои се борат со огнот на терен, но владата на Ердоган се соочи со критики за брзината на одговорот.

Повеќе од една недела по избивање на првите пожари, 16 од нив сè уште горат, рече министерот за шумарство.

– Пожарот се прошири на термоцентралата, рече Мухамер Токат, градоначалник на Милас, додавајќи дека термоелектраната е евакуирана.

Претходно, екологистите изјавија дека се загрижени за можното ширење на пожарот во складиштето за јаглен во термоцентралата. Во последните две недели, во пожарите во Турција изгоре трипати поголема површина од она што се уништува од пожар во просек секоја година, соопшти Европската противпожарна агенција.