Published: Thursday, January 20, 2022 09:16
ЕСМ од утре (21 јануари), согласно владината одлука, ќе го преземе управувањето со БЕГ и Скопје Север до крајот на грејната сезона, со што се решава проблемот со парното затоплување во Скопје, а за скопјани е најавено дека ќе добијат три дополнителни часа греење, односно до 1 часот по полноќ.
Владата, истакнуваат од СДСМ, „преку ЕСМ ќе го стабилизира пазарот на топлинска енергија, откако во решавањето на проблемот не партиципираа Град Скопје и општините“.
Владеачката партија уште еднаш ја обвини градоначалничката, Данела Арсовска дека „ги игнорирала барањата на скопјани за решавање на проблемот со парното.
Додека градоначалничката од ВМРО-ДПМНЕ, Данела Арсовска ги игнорираше барањата на скопјани да се реши проблемот со парното, Владата предводена од СДСМ презеде низа одговорни чекори за надминување на кризата со топлинската енергија. Согласно владината одлука, АД ЕСМ од 21 јануари да го преземе управувањето со БЕГ и Скопје Север се до крајот на грејната сезона, со што се решава проблемот со парното затоплување во Скопје,а скопјани добиваат дополнителни три часа греење до 1:00 часот по полноќ, истакнуваат од СДСМ.
Од ВМРО-ДПМНЕ, пак, денеска повторно го обвинија новиот премиер Димитар Ковачевски, кој беше заменик-министер за финансии во претходната влада на Зоран Заев, дека бил меѓу оние кои предизвикале да порасне цената на парното.
„Пиунот Ковачевски предизвика инфлација како заменик министер, а потоа ја поскапи струјата и парното. Пиунот Ковачевски е директно виновен за сите негативни ефекти во економијата. Тој е заменик министер за финансии додека долгот надмина 60 отсто од БДП, додека имаме најмал број на странски директни инвестиции во регионот и додека стопанството и граѓаните се соочени со инфлација. Истиот Ковачевски и СДСМ со нивната неспособност придонесоа за раст на цената на струјата и парното од 15 отсто. Од овој месец граѓаните ќе плаќаат по најмалку 1 500 денари повеќе како резултат на неспособноста на СДСМ и Ковачевски навреме да ископаат јаглен и да обезбедат евтин гас“, велат од ВМРО-ДПМНЕ.