Министрите од Европската Унија денеска остро ја осудија најновата серија руски воздушни напади врз Кијив, во кои загинаа повеќе лица, меѓу нив и деца, и повикаа на воведување построги санкции против Москва, јави ДПА.
Овие напади покажуваат дека Путин се потсмева на секој обид за мир, изјави високата претставничка на ЕУ за надворешна политика и безбедност, Каја Калас, пред почетокот на дводневниот состанок на министрите за одбрана и надворешни работи во Копенхаген. Таа додаде дека новите санкции насочени кон руската енергетика и финансискиот сектор „најмногу ќе ја погодат Русија“.
Сличен став изрази и литванската министерка за одбрана Довиле Шакалиене, која изјави дека Путин „евтино купува време за да убива повеќе луѓе и да симулира волја за прекин на сопствените злосторства“.
Ирскиот министер за одбрана Сајмон Харис оцени дека неопходно е разгледување на дополнителни санкции за вршење поголем притисок врз Москва.
Претседателката на Европската комисија Урсула фон дер Лајен најави дека наскоро ќе биде претставен 19-тиот пакет санкции.
Министрите во Копенхаген ќе разговараат и за безбедносните гаранции за Украина по завршувањето на војната.
Во агендата за утрешниот ден е вклучена и војната во Газа, за која земјите-членки на ЕУ имаат поделени ставови – дел, како Шпанија и Франција, бараат построг однос кон Израел, додека други, како Германија, се противат на санкции.