ЦСКА Москва се врати на врвот на табелата во кошаркарската Евролига што на 24 часа го држеше Олимпијакос. „Армејците“ во последниот меч од деветтата рунда ја совладаа Уникаха во Малага со 89:80 за седма победа во сезоната колку што има има и тимот од Пиреја. Серхио Родригез со 21 поен, Нандо де Коло со 14 и Воронцевич и Хигинс по 13 го предводеа рускиот шампион на гостувањето во Шпанија, најефикасен во поразената екипа беше Џејмс Огастин со 18 коша.
Панатинаикос го израмни билансот (шест победи и три порази) со Фенербахче по триумфот против Реал Мадрид со 82:80. „Кралскиот“ клуб, кој е ослабен со неиграње на повредените Љуљ, Кузмиќ, Рендолф и Ајон, имаше и плус 14 (54:40) на почетокот на третиот период, но не успеа да одржи така висок ритам во крајот.
Грчкиот состав не загуби многу време за соземање, фати приклучок, а со тројката на Риверс во 36 минута и поведе со 75:73. Резултатски тесен беше финишот, гостите имаа 15 секунди за организација на последниот напад меѓутоа Треј Томкинс не погоди тројка од отворениот шут што значеше и дефинитивен крај на надежите на Реал за победничко враќање од жешкото гостување во Атина.
Евролига, 9 коло
Уникаха Малага – ЦСКА Москва 80:89
Панатинаикос – Реал Мадрид 82:80
Фенербахче – Химки 71:67
Црвена звезда – Басконија 81:85
Барселона – Макаби Тел Авив 89:67
Милано – Олимпијакос 85:86
Бросе Бамберг – Валенсија 83:82
Жалгирис – Анадолу Ефес 91:83
Табела: ЦСКА Москва (7 поб.-2 пор.), Олимпијакос (7-2), Фенербахче (6-3), Панатинаикос (6-3), Реал Мадрид (5-4), Макаби Тел Авив (5-4), Жалгирис (5-4), Химки (5-4), Бросе Бамберг (5-4), Барселона (4-5), Басконија (4-5), Валенсија (3-6), Милано (3-6), Уникаха Малага (3-6), Анадолу Ефес (2-7), Црвена звезда (2-7).