Вимблдон го приреди најголемото изненадување во мечевите од четвртото коло во ФА куп. Третолигашот, кој е последен во англиската лига 1 (трета лига), на својот „Кингсмедоу“ стадион во Лондон го совлада Вест Хем со 4:2.

Домашните во целост го контролираа дуелот со „чеканите“ и со головите на Апиа во 34. минута и Вагстад во 41. минута заминаа на одмор со 2:о. Во првата минута по враќање на терен, Вагстаф по вторпат го матира Адриен за убедливи 3:0. Надеж за избегнување на најлошото сценарио кај Мануел Пелегрини донесоа Перез во 57. минута и Андерсон во 71. минута кои намалија на 3:2, но точка на секаква неизвесност стави Сибик со погодокот во 88. минута.

Милвол, пак, беше џелатот на Евертон во четвртото коло. Популарните „карамели“ од „Гудисон парк“ двапати водеа на гостувањето во југоисточен Лондон со головите на Ришарлисон во 43. минута и на Тосун во 72. минута, второлигашот израмнуваше преку Грегори во втората минута од екстра времето во првиот дел и преку Купер во 75. минута. Решавачкиот удар за уривање на Евертон го зададе Валас во 94. минута.

На дуелот на стадионот „Ден“ му претходеше дивеење на навивачите на Милвол, едни од најозлогласените во Англија, кои притоа се судрија и со полицијата.

ФА Куп – 4 коло

Вимблдон – Вест Хем 4:2

Милвол – Евертон 3:2

Свонси – Гилингам 4:1

Шрусбери – Вулверхемптон 2:2

Портсмут – КПР 1:1

Њукасл – Вотфорд 0:2

Мидлсборо – Њупорт 1:1

Манчестер сити – Барнли 5:0

Донкастер – Олдам 2:1

Брајтон – ВБА 0:0

Акрингтон – Дерби 0:1