Роџер Федерер во вербална војна со дел од фудбалските репрезентативци на Швајцарија. Најдобриот светски тенисер упати критики кон националниот тим по поразот од Шведска (0:1) за елиминацијата во осминафиналето на Светското првенство во Русија за што експресно доби одговор од Валон Бехрами.
„Не создадовме доволно шанси, па добивме што и заслуживме“, се огласи Федерер.
Најпогоден од коментарот на тенискиот маестро од Базел, се чини, се најде Швајцарецот од албанско потекло, Валон Бехрами. Фудбалерот на Удинезе не можеше да премолчи и, веројатно, во име на сите кратко му возврати:
„Гледај ја твојата работа“, беше одговорот на играчот роден во Косовска Митровица.
Преписката меѓу Федерер и Бехрами предизвика хаос во швајцарските медиуми кои, сепак, застанаа на страна на моментно вториот светски рекет. Дали Федерер ќе продолжи со коментари на темата или ќе остане на веќе кажано ќе видиме по мечот со Германецот Шруф во третото коло на Вимблдон.