Социјалната мрежа Фејсбук соопшти дека се шокирани што се измамени со употребата на податоци од своите корисници од компанијата Кембриџ Аналитика истакнувајќи дека ја разбираат сериозноста на проблемот.

Во соопштението Фејсбук истакнува дека компанијата е одлучна строго да ја примени својата политика за да ги заштити приватните информации и дека ги презема сите расположливи мерки за ефикасно спроведување.

Портпаролот на Фејсбук изјави дека раководителите на групата цело време работат на тоа да дојдат до сите податоци и да преземат потребни мерки бидејќи ја разбираат сериозноста и значењето на проблемот.

Кембриџ Аналитика е обвинета дека нелегално дошла до податоци на корисниците на Фејсбук. Оваа компанија која има канцеларии во Велика Британија и САД обвинета е дека на недозволен начин користела лични податоци на повеќе од 50 милиони корисници на Фејсбук без нивна согласност, за да му помогне на Трамп да победи на изборите во 2016.

Компанијата вчера соопшти дека Одборот го суспендира извршниот директор Александар Никс со непосреден ефект, во очекување на целосна независна истрага.

Постои ли врска помеѓу Кембриџ Аналитика и Русија

Се проценува дека Фејсбук како компанија загубила околу 37 милијарди долари по скандалот со протекување на личните податоци на повеќе од 50 милиони корисници.

Тоа ги исплаши инвеститорите па вредноста на акциите на Фејсбук паднаа околу седум проценти, објави Си- Ен- Ен.

Извршниот директор и основач на Фејсбук Марк Цукерберг претрпе загуба од четири милијарди долари.

Падот на вредноста на акциите уследи откако американските официјални лица повикаа за истрага поради тоа што личните податоци на 50 милиони луѓе од Фејсбук се земени и злоупотребени без одобрување.