Плејоф мечот меѓу фудбалските репрезентации на Македонија и на Косово на 26 март на арената „Тоше Проески“ може да се игра и без присуство на гледачи. Ова се наметнува како опција поради ширењето на коронавирусот и препораките на Владата да се откажат сите масовни јавни собири, а спортските натпревари да се играат пред празни трибини. Мерката што првично важеше до утре е пролонирана за дополнителни седум дена, но не е исклучена можноста и за натамошно останување во сила.
Од Фудбалската федерација на Македонија (ФФМ) за Нова ТВ истакнаа дека ја следат состојбата и одржуваат постојана комуникација со здравствените власти во пресрет на важниот меч на „црвено-жолтите“ кои во случај да триумфираат против косовската селекција, пет дена подоцна ќе одат на мегдан и кај победникот од пресметката меѓу Грузија и Белорусија.
„Имавме состанок во Амстердам и од УЕФА ни порачаа дека мечот не е загрозен од коронавирусот. Сепак, ние ќе ги следиме препораките на министерството за здравство кое е надлежно во оваа ситуација. Во најлош случај, можно е натпреварот да се игра пред празни трибини, а парите ќе им бидат вратени на сите кои купиле карти. Но, се зависи од одлуката на Министерството за здравство“, изјави портпаролот на ФФМ, Златко Андоновски.