Фудбалската федерација на Македонија (ФФМ) негира даночно затајување и фалсификување или уништување на деловни книги, дела за кои Управата на финансиска полиција поднесе кривични пријави до Основното Јавно Обвинителство (ОЈО) против неа како правен субјект и против нејзиниот поранешен претседател Илчо Ѓорѓиоски.
„Најодговорно тврдиме дека секогаш сме работеле и ќе работиме согласно Законот за сметководство на непрофитните организации. Подолг период подлежиме на координирани инспекциски надзори и контроли од страна на државните органи и институции. Финансиското работење на Фудбалската федерација на Македонија доби позитивни извештаи и од Управата за јавни приходи и од независните ревизори“, пишува во соопштението на ФФМ.
Како што е наведено, пак, во соопштението од Финансиската полиција, делата за кои се товари екс претседателот на ФФМ се сторени во перидот од 1 јануари 2017 до 27 февруари 2018. Ѓорѓиоски, според Финансиската полиција, „свесно и со намера во име и на сметка на ФФМ прикажал лажни и невистини податоци во завршната сметка за 2017 година што на 27 февруари лани ја поднел до УЈП и Централниот регистар“.
Поранешниот прв човек на Федерација се сомничи дека во сметководствената евиденција не извршил отпис на ненаплатени побарувања од купувачи постари од три години и тоа од ликвидираниот субјект АД Тобако Скопје во износ од 10.639.293 денари и од АД Југохром Јегуновце во износ од 6.169.832 денари.
На ваков начин како што велат од Финансиската полиција, Ѓорѓиоски не ја зголемил даночната основица од непризнати расходи за даночни цели, за кој износ не пресметал и не платил данок на добивка со што ФФМ остварила противправна корист од 1.680.912 денари.
„По однос на обврските на АД Тобако Скопје беше инициран судски спор чиј исход е позитивно потврден во корист на Фудбалската федерација на Македонија (ФФМ). Истиот е даден на наплата до надлежен извршител. По отворање на стечајната постапка за АД Тобако Скопје, долгот е навремено предјавен и истиот е позитивно утврден и признат од страна на стечаен управник и стечаен судија во соодветна постапка со што ова побарување на Фудбалската Федерација на Македонија (ФФМ) е признато и утврдено во стечај“, се наведува во реакцијата на ФФМ.
Во вториот дел од дописот на ФФМ е посветен простор на случајот со АД Југохрам Јегуновце.
„Посочениот деловен однос со АД Југохром Јегуновце е од 2010 година по што во 2013 година е склучено правно дело со кое се утврдуваат права и обврски за двете договорни страни. Обврските кон Фудбалската федерација на Македонија се исплатени во целост од страна на правен субјект – пристапувач кон долг“.
Од ФФМ истакнуваат дека официјално немаат добиено никаков формален документ.
„Како сериозна и професионална институција сме подготвени да го потврдиме нашето законско работење пред соодветните органи“, е пораката од ФФМ.
На крај на соопштението се наведува дека ФФМ има побарување во износ од 7.492.059.00 денари од Управата за јавни приходи.