Македонската фудбалска репрезентација бележи скок за една позиција на најновбата ранг листа на ФИФА. Со триумфот над Словенија во Скопје и поразот од Полска во Варшава, во квалификациите за Европското првенство во 2020 година, „црвено-жолтите“ имаат вкупно 1.344 бода, пет повеќе во однос на минатиот месец. Веднаш пред националниот тим се Обединетите Арапски Емирати, Албанија, Словенија и Еквадор, а во врат им дишат Канада, Саудиска Арабија, Кина, Јужна Африка и Ел Салвадор.
Составот на топ 10 останува ист како и во септември, со внатрешни промени на позициите на неколку селекции. Лидерската и натаму ја држи Белгија со 1.755 бода пред Франција и Бразил кои имаат 1.726, односно, 1.715 бода. Англија е четврта со 1.651 бода, а по неа следуваат Уругвај (1.642), Португалија (1.632), Хрватска (1.631), Шпанија (1.625), Аргентина (1.617) и Колумбија (1.615).
Наредната ФИФА ранг листа ќе биде објавена на 28 ноември. Во меѓувреме, македонските фудбалери ќе играат против Австрија во Виена на 16 ноември и три дена подоцна со Израел на домашен терен во завршните настапи во квалификациите за ЕП 2020.