Министерот за здравство, Венко Филипче очекува епидемијата на морбили да заврши за околу 14-15 дена, колку што е периодот на инкубација, од моментот кога последниот пациент со мали сипаници е примен на Инфективната клиника.
„Се надевам дека нема да бидат пријавени нови случаи на морбили“, вели министерот Филипче во интервју за ТВ „24 Вести“.
Според него, најголем проблем во однос на невакцинираноста кај нас се децата кои одат во градинка, затоа што кај децата кои ќе тргнат во прво, односно, второ одделение сериозно е висок опфатот со вакцинација.
„Ние имаме проблем со малите деца. Родителите очигледно под влијание на антивакциналните кампањи чекаат децата да проодат или да прозборат плашејќи се притоа да не заболат од некаква болест што наводно е во релација со вакцините и после тоа ги вакцинираат. Значи најголем процент од невакцинираните се деца со една, со две, со три, со четири години. По таа возраст, процентот на невакцинирани деца значително опаѓа, појаснува Филипче.
Тој истакна дека за справување со проблемот со антивакциналните кампањи, покрај прогласувањето на епидемија од морбили, од Министерството спроведуваат на терен кампања за да се подигне свеста кај популацијата и да се покаже дека не постои апсолутно никаков ризик од вакцинацијата, како и оти таа не може да се доведе во корелација со ниту една болест.
„Како што реков, процентот на невакцинирани деца по четвртата година бележи надолен тренд. Тоа е период кога децата стануваат посамостојни и тогаш родителите се сигурни дека не може тоа да се доведе во релација со некоја болест како аутизмот и ги вакцинираат своите деца. Затоа сметам дека антивакциналните кампањи се апсолутно неоправдани и носат само еден огромен ризик за враќање на болести што се смртоносни и што кај нас биле искоренети пред многу години, а кои денес се огромен проблем во неразвиените земји“, додаде македонскиот министер за здравство.
Нагласи дека во тек е сериозна кампања и кај здравствените работници за, како што рече, сведоштва во многу случаи во кои токму тие ги промовираат антивакциналните кампањи. Свесни сме за тоа и токму во овој момент се прави анализа на сите документи што биле издадени на невакцинираните деца за да утврдиме вакви случаи, заклучи Филипче.