Министерот за здравство Венко Филипче од трибината на СДСМ во Охрид апелира до сите граѓани да се вакцинираат. Потребна нѝ е, вели тој, здрава нација за здравството да може да се занимава и со други работи, освен со пандемијата.
– Соочени сме со еден голем предизвик, а тоа е масовната вакцинација. Апелирам до сите да се вакцинирате. Потребна ние е здрава нација и здрави граѓани, потребно ни е здравството да може да се занимава со други работи, освен со пандемијата, истакна потпретседателот на СДСМ на трибината под мотото „Најдоброто за нашата општина“.
Филипче, покрај за имунизација на населението, говореше и за потребата од инвестиции во туризмот, во земјоделството, во ИТ секторот, и воопшто за градење на силна економија што ќе може да ја издржи секоја криза.
– Така ќе продолжиме по патот на осовременување на нашата држава, за младите тука да ја гледаат својата иднина, нагласи Филипче.
Министерот за здравство се осврна и на обвинувањата на опозициската ВМРО-ДПМНЕ за наводни предавства, за што порача: Патриотизам е силно здравство, силно правосудство, силно образование, силна економија, а нашиот јазик и нашата историја не се на продажба.