Министерот за здравство Венко Филипче информираше дека најголем број од починатите лица од ковид-19 имале хронична болест на белите дробови или дијабет.
„Може да ја извадиме точната статистика. Тоа се хроничната опструктивна болест, хроничната кардиовласкуларна болест, хроничната слабост на срцето во смисла на кардиомиопатија и дијабетот. Стандардните хронични состојби што го слабеат кардиоциркулаторниот капацитет, пулмоналниот капацитет, белодробниот и било каква инфекција, белодробна или друга значи дека може да има поголем ризик од смртност“, нагласи Филипче.
Во однос на тоа во кои скопски општини има заразени лица од коронавирус, министерот рече дака се уште се прави анализа за општините во Скопје и оти ќе биде споделена со јавноста кога ќе ја изготват епидемиолозите.
На прашања дали се очекува да има нови жаришта со ковид-19, кои општини се потенцијални и од кои причини би можеле да доведат до нов бран на коронавирусот, Филипче наведе дека последната голема изолирана бројка била во Општина Чаир, истакнувајќи дека нема непредвидлив ризик и оти сите заболени се во рамки на познатите кластери.
„Последната голема изолирана бројка, 20. лица, беше од скопската Општина Чаир во врска со семеен настан, меѓутоа тука се веќе сите лица кои покажаа симптоми. Друго место каде имаме еден таков одреден ризик е Тетово и околината на градот. Нема нешто кое што е непредвидлив ризик, сега засега, имајќи предвид дека и во Тетово огромен број од новодијагностицираните беа од познати заболени. Значи се е во рамките на тие кластери, блискиот респираторен контакт од внатре во еден кластер или меѓу веќе познати кластери“, образложи министерот.