Published: Sunday, September 26, 2021 13:46
Здружението „Борка-за секој нов ден“ денеска организираше настан „Race for the Cure – Напред розово“, во рамки на 13-тата кампања за борба против рак на дојка. На настанот присуствуваше и министерот за здравство, Венко Филипче, кој истакна дека, почнувајќи од 2019 година, заеднички е многу направено.
Системски го подобривме делот на пристапот и квалитетот на здравствената заштита кај пациентите со карцином на дојка и други малигни болести. Во нашата земја, повеќе нема пациент со малигна болест за кој не е обезбедена најквалитетна, иновативна биолошка терапија и можност за скрининг во повеќе центри низ земјата. Пациентите кои не се со живеалиште во Скопје, сега ја примаат терапијата во својот град, а доколку не се подвижни, преку Црвениот крст таа им се носи и дома. Покрај лекувањето, пациентите имаат и психолошка поддршка која е една од најважните сегменти за успешно лекување на болестите, посочи Филипче.
Министерот потенцира дека останува посветеноста за обезбедување на максимална здравствена заштита за сите граѓани и активна и инклузивна соработка со граѓанските организации.
Само со заеднички напори може да го унапредиме нашиот здравствен систем. Редовните лекарски контроли, но и самопрегледот на дојка се најефикасни за рано откривање и дијагностицирање на болеста, напиша Филипче на Фејсбук.
Кампањата за борба против рак на дојка ја поддржа и амбасадорката на САД Кејт Мари Брнз.