Атлетико Мадрид ја слави третата шампионска титула во Европа лигата, вкупно седма во меѓународните фудбалски купови. Популарните „јорганџии“ во 13. европско финале во клупската историја го совладаа Олимпик Марсеј со 3:0. Два гола за тимот на Диего Симеоне постигна Антоан Гризман (21. минута и 49. минута), третиот за потврда на победата на „Стад де Лион“ беше дело на Габи во 89. минута.
Составот од „Велодром“ беше, речиси, безопасен во мечот за трофејот. Обидите за загрозување на Облак во воведните и во завршните десетина минути беа премалку за промоција во прв француски претставник на тронот во натпреварувањето. Освен убедливиот пораз, Олимпик, а можеби и „триколорите“ за СП 2018, го загубија и Дмитри Паје кој поради повреда го напушти теренот со солзи во очите по пола час игра.
https://www.youtube.com/watch?v=PTb0AAhUG40
За моментно четвртопласираната екипа во Лига 1 ова е трет пораз во Лига Европа по 1999 година и во 2004 година и на тој начин на двата европски трофеја досега, во поранешниот Куп на европски шампиони (КЕШ) во 1993 година и во Интертото купот во 2005 година.
Гризман само деветти двоен стрелец во финалните мечеви
Францускиот репрезентативец Антоан Гризман е само деветти двоен стрелец во финалните мечеви во Лига Европа или поранешниот Куп на УЕФА. Габи, пак, ја запиша првата реализација за Атлетико Мадрид по август во 2015 година, голот што го постигна во финишот на средбата во Лион беше негов прв за шпанскиот тим во УЕФА меч од 2011 година и воедно, со своите 34 години, стана највозрасен стрелец во финале во ЛЕ.
Атлетико со победата се придружи на Интер, на Јувентус и на Ливерпул со три трофеи во натпреварувањето во кое рекордер е Севилја со пет освоени пехари.