Нема терен каде не е пребарано наоколу од селото. Максимално сме анагижирани во потрагата, нашите екипи се вклучија уште од 1 март. Останува утре да се истражи уште еден дел од Црна Река, чие течение нуркачите од Велес го пребаруваа во саботата , но ништо не пронајдоа, изјави Ибрахими за НоваТВ
Потрагата по 10-годишниот Петар Џобоски продолжува и утре. Екипа од Дирекцијата за заштита и спасување од Велес ќе ја пребарува Црна Река, во делот којшто завчера не беше истражен, ни изјави Севгани Ибрахими, раководител на одделението за организациски работи во Дирекцијата за заштита и спасување.
Петар исчезна пред 10 дена од домот во прилепското село Врбско, во минатиот петок попладне, од кога трае и потрагата по детето. Викендов нуркачи од тимот од Велес, заедно со другите спасители од службата Златоврв, ДЗС, МВР и други, го пребаруваа течението на Црна Река.
– Нема терен каде не е пребарано наоколу од селото. Максимално сме анагижирани во потрагата, нашите екипи се вклучија уште од 1 март. Останува утре да се истражи уште еден дел од Црна Река, чие течение нуркачите од Велес го пребаруваа во саботата , но ништо не пронајдоа, изјави Ибрахими за НоваТВ.
Претходно, спелеолозите од службата Златоврв влегоа и во окно од напуштениот рудник „Партизанка“, коешто е длабоко 70 метри.
– Во рудникот немаше никакви траги, а без резултат беше и потрагата на Црна Река која ја пребарувавме завчера, а која, поради временските услови, беше надојдена. Потрагата продолжува и утре, ни рече Дарко Неданоски, спелеолог и раководител на спасителната служба Златоврв од Прилеп.
Над 100 членови на полициски екипи, од војската, Дирекција за заштита и спасување, ловџии, спасителни служби, пожарникари, трагаат веќе 10 дена по детето.
Основното јавно обвинителство од Прилеп во минатата недела отвори предмет за исчезнатото дете, а сослушани биле родителите на Петар и неговиот постар брат.
Потрага по Петар по течението на Црна Река (ФОТО: Служба Златоврв)
( Извор: Дирекција за заштита и спасување и служба Златоврв)
(Љ.Б.)