Македонскиот тим во состав претседателот Стево Пендаровски, министерката за одбрана Славјанка Петровска и шефот на дипломатијата Бујар Османи, влезе во конгресната палата на Мадрид каде што се одржува самитот на НАТО.
На свечениот пречек, шефовите на делегациите беа поздравени од страна на домаќинот, премиерот на Кралството Шпанија, Педро Санчез и Генералниот секретар на НАТО Алијансата, Јенс Столтенберг.
Во фокусот на состанокот е зајакнување на долгорочното одвраќање и одбрана на НАТО, лансирање на Стратешкиот концепт на НАТО 2030, одржување на трансатланското единство и солидарност на Алијансата, и потврдување на партнерствата и поддршка за политиката на отворени врати во светло на апликациите за членство во НАТО.
Веста која пред почетокот на самитот предизвика внимание е дека Турција се откажа од ветото кон Шведска и Финска за влез во НАТО, а од своја страна овие две земји се обврзаа дека веднаш ќе ги почнат разговорите со Турција околу екстрадиција на екстремисти.
Овој самит е посебен и според една друга специфика. Никогаш во историјата на Алијансата од 1949 година не бил организиран самит во исто време додека се води војна на европскиот континент. (С.К.)