Претседателот на Србија, Александар Вучиќ и премиерот на Албанија, Еди Рама денеска остварија неформални средби во Скопје со премиерот Зоран Заев и градоначалникот на Град Скопје, Петре Шилегов. Вучиќ и Рама испија кафе за добредојде во еден од рестораните во централното градско подрачје.

По кафето, Заев ги прошета Вучиќ и Рама на скопскиот кеј, со градскиот татко Шилегов.

– Балканот е нашиот заеднички европски дом во кој се поддржуваме и во кој ги унапредуваме односите. Нашиот поглед е напред, кон подобро утре, кон економски раст и развој, кон добробит за нашите народи, напиша премиерот Зоран Заев на „Фејсбук“.

Вучиќ претходно изјави дека посетата на Скопје е многу важна, посочувајќи ги притоа договорите што ќе бидат потпишани утре меѓу Србија, Македонија и Албанија.

– Едниот се однесува на побрз проток на стоки и услуги меѓу трите земји, другиот за заедничко дејствување по прашањето на природните катастрофи, а третиот за создавање единствен пазар на труд, што подразбира укинување на работните дозволи, изјави Вучиќ, додавајќи дека тоа значи дека кој работи во Белград, може да работи и во Скопје и Тирана и обратно.

Вучиќ кажа дека веќе се водат разговори за изработка на електронски персонализирани картички за граѓани од трите земји, кои ќе работат преку мобилна апликација, што ќе овозможат различни придобивки. Тој додаде дека тоа ќе се направи во договор со компаниите, така што кога луѓето доаѓаат во Србија, Албанија и Македонија, да имаат попусти за билети за превоз, во хотели, ресторани, од пет или 10 отсто.

– Сакаме да направиме брзи ленти. Кога ќе ги прошириме премините Прешево и Табановце, како и другите премини, ќе има брзи ленти за камиони, но и за автомобили, кои ќе можат да минуваат побрзо од некои други возила. Со ова креираме поинаква иднина, кажа Вучиќ.

Инаку, утре Скопје ќе биде домаќин на економски форум за регионална соработка во организација на Стопанските комори на Македонија, Србија и на Албанија, на кого ќе учествуваат Заев, Вучиќ и Рама. На регионалниот економски форум во Скопје ќе биде променето името на иницијативата „мини Шенген“.

На еконмскиот формум ќе присуствуваат претставници на повеќе од 300 компании од Македонија, Србија и Албанија, како и од повеќе други земји од регионот, но и претставници од меѓународните институции. Најголем дел од компаниите доаѓаат од градежништвото, од земјоделско-прехранбениот сектор, од енергетиката, од машинеријата, од автомобилската и текстилна индустрија, од туризмот, од ИКТ, од телекомуникации, од транспорт и логистика…

Иницијатива „мини Шенген“: Вучиќ и Рама денеска и утре во Скопје