Базел го приреди најголемото изненадување во осумте вечерашни дуели во УЕФА Лигата на шампиони (ЛШ). Со голот на Михаел Ланг во 90 минута, швајцарскиот состав, на својот „Сент Јакоб Парк“, го шокира Манчестер јунајтед, потсети на сезоната 2011/12 во која, исто така, славеше над „црвените ѓаволи“ со 2:1 и остана на второто место во групата А кое води во нокаут фазата. Тимот на ЦСКА, претходно во истата конкуренција, во Москва ја совлада Бенфика со 2:0. Во последната шеста рунда, составот на Мурињо ќе биде домаќин на рускиот тим, а Базел го очекува гостување на стадионот „Луж“ во Лисабон.
Селтик, пак, доживеа потоп во Париз во дуелот со моќниот ПСЖ. Шкотланѓаните поведоа во воведната минута на „Паркот на принцевите“, но реализацијата на Дембеле не донесе ништо добро по нив. Напротив, се чини дека само ги разлути „светците“ кои до крајот возвратија со седум гола во мрежата на Гордон. По двапати Нејмар и Кавани и по еднаш Мбапе, Верати и Алвеш ги изрешетаа гостите од Глазгов за максимален ефект во групата Б во која и Баерн Минхен триумфира против Андерехт со 2:1.
Атлетико Мадрид ги воскрена шансите за европска пролет во ЛШ по победата над Рома со 2:0. Шпанците ги осигураа бодовите во вториот дел. Најава за хепиенд на „Ванда Метрополитано“ даде Антоан Гризман во 69 минута што ја потврди Гамеиро во 85 минута. „Волчицата“ во последните десетина минути играше без исклучениот Бруно Перез. Челзи обезбеди осминафинале во ЛШ по убедливиот триумф над Карабаг во Азербејџан со 4:0.
Двата меча во групата Д донесоа заплет на табелата. Спортинг Л. се врати во игра за место меѓу најдобрите 16 по победата над Олимпијакос со 3:1. Но, мисијата ќе биде пеколно тешка за „зелено-белите“ од Лисабон за кои македонскиот репрезентативец Стефан Ристовски влезе во игра во 85 минута. Имаат бод помалку од Јувентус, а згора на тоа во последното коло ќе истрчаат на мегдан на Барселона додека италијанскиот првак на 5 декември ќе гостува во Пиреја на екипата на Олимпијакос.
Лига на шампиони
Група А
Базел – Манчестер јунајтед 1:0
ЦСКА Москва – Бенфика 2:0
Табела: Манчестер јунајтед 12, Базел 9, ЦСКА Москва 9, Бенфика 0.
Идно коло (5 декември): Манчестер јунајтед – ЦСКА Москва, Бенфика – Базел.
Група Б
ПСЖ – Селтик 7:1
Андерлехт – Баерн Минхен 1:2
Табела: ПСЖ 15, Баерн Минхен 12, Селтик 3, Андерлехт 0.
Идно коло (5 декември): Баерн Минхен – ПСЖ, Селтик – Андерлехт.
Група Ц
Атлетико Мадрид – Рома 2:0
Карабаг – Челзи 0:4
Табела: Челзи 10, Рома 8, Атлетико Мадрид 6, Карабаг 2.
Идно коло (5 декември): Челзи – Атлетико Мадрид, Рома – Карабаг.
Група Д
Јувентус – Барселона 0:0
Спортинг Лисабон – Олимпијакос 3:1
Табела: Барселона 11, Јувентус 8, Спортинг Лисабон 7, Олимпијакос 1.
Идно коло (5 декември): Барселона – Спортинг Лисабон, Олимпијакос – Јувентус.