Шахтјор ја совлада Рома со пресврт во второто полувреме, а Севилја и Манчестер јунајтед завршија со почетниот резултат во вечерашните дуели во Лигата на шампиони со кои е заокружен првиот дел од осминафиналната фаза.
Украинскиот состав ќе патува на реванш во Рим со гол предност, откако славеше над Рома со 2:1 на стадионот во Харков. Ченгиз Ундер погоди за водство на „волчицата“ во финишот на првото полувреме што беше петта негова реализација во последните шест настапи во кои запиша и една асистенција. Но, калчолигашот не издржа до крај.
Второто полувреме мина во знак на Шахтјор чии играчи, набрзо по враќање од соблекувална, успеаја да ја анулираат негативата. Израмнувачкиот гол беше дело на Фереира во 52. минута по одлично додавање од дефанзивецот Ракитски од преку 50 метри, а неколку напади подоцна Аргентинецот можеше и по вторпат да го матира Алисон. Но, бразилскиот чувар на мрежата на римјаните со извонредна реакција спречи нова радост на противничките фудбалери.
Алисон, сепак, беше немоќен при прекинот во 71 минута. Шахтјор доби слободен удар во опасната зона што во прекрасен погодок го претвори Фред за 2:1, резултат што остана актуелен до последното огласување на главниот судија Вилијам Колум од Шкотска.
Севилја и Манчестер јунајтед одиграа 0:0 на „Рамон Санчез Пискуан“, а позадоволни од конечниот епилог може да бидат гостите од Англија. Давид де Хеа неколкупати ги спасуваше „црвените ѓаволи“ на Жозе Мурињо кои упатија само четири удари кон целта наспроти 25. на домашните од кои осум одеа во рамки на голот. Муриел при крај на првото полувреме и Ленгле во 63. минута ги имаа најзрелите прилики за водство на шпанскиот претставник, но голманот на премиерлигашот од „Олд Трафорд“ беше непремостлива пречка.
Мурињо го почна натпреварот во помалку изненадувачки состав, без Лингард, Погба, Рашфорд и Марсијал. Последните тројца, сепак, добија шанса во продолжението, но без влијание врз крајниот резултат кој е единствен без голови во првиот круг осминафинални судири во шампионската Лига на УЕФА.
Лига на шампиони, осминафинале, први мечеви
Севилја – Манчестер јунајтед 0:0
Шахтјор Доњецк – Рома 2:1
Челзи – Барселона 1:1
Баерн Минхен – Бешикташ 5:0
Реал Мадрид – ПСЖ 3:1
Порто – Ливерпул 0:5
Јувентус – Тотенхем 2:2
Базел – Манчестер сити 0:4