Манчестер сити го совлада Базел со 4:0, а Јувентус и Тотенхем ремизираа 2:2 во првите осминафинални дуели во фудбалската Лига на шампиони на УЕФА. „Граѓаните“ во целост ја оправдаа фаворитската улога во однос на Швајцарците и уште по воведните 90 минути од двомечот може да се прогласат за четвртфиналисти во елитното натпреварување што не е случај со актерите во италијанско-англиската пресметка.
Тимот на Пеп Гвардиола со сета сила удри по Базел и тоа на неговиот „Сент Јакоб Парк“. Патот кон најдобрите осум го трасираа со три гола во првиот дел, за рутински да го одработи вториот и да осигура недостижна залиха за реваншот на „Етихад“. Серијата голови ја отвори и затвори Гундоган во 14 минута и во 53. на кого се надоврзаа Давид Силва во 18. и Серхио Агеро во 23.
Јувентус, пак, одлично започна со Тотенхем во Торино и по само девет минути имаше 2:0 што во тие моменти се гледаа како капитални за сигурна победа на калчолигашот. Амбиентот на „Јуве арена“ го зовре Гонзало Игуаин со фантастичниот погодок од свртување во втората минута и прецизно изведениот пенал во деветтата. Хари Кејн успеа да намали на 2:1 до паузата, но и аргентинскиот напаѓач на „старата дама“ да промаши од белата точка.
Казната за Јуве стигна во вториот дел. Кристијан Ериксен од слободен удар во 71 минута ги врати „спарси“ во егал што знаеја да го сочуваат до крај на натпреварот и драстично да ги оживеат надежите за топ 8 по шокантниот вовед по нив.
Лига на шампиони, осминафинале, први мечеви
Јувентус – Тотенхем 2:2
Базел – Манчестер сити 0:4
Среда (20,45 ч.)
Реал Мадрид – ПСЖ
Порто – Ливерпул